"Qansha áıeldiń taǵdyry synǵanyn kútemiz?": Májiliste zorlyq-zombylyq máselesi kóterildi

Májilis depýtaty Juldyz Súleımenova elimizdegi turmystyq zorlyq-zombylyq máselesin kóterip, premer-mınıstr Álıhan Smaıylovqa saýal joldady. 

"Jemqorlyq úshin sottalyp, artynan raqymshylyqqa ıe bolǵan eks-sheneýnik óz áıelin óltirdi degen kúdikke ilindi" degen jantúrshigerlik ashyq aqparattardan qoǵam dúrbeleńge tústi. Otbasylyq zorlyq-zombylyq, qatygez patrıarhaldyq ozbyrlyqqa shydamaǵan áıelderdiń jan daýysyn estıtin jáne qatań shara qabyldaıtyn ýaqyt jetti dep bilemiz", - dedi depýtat. 

Súleımenovanyń aıtýynsha, turmystyq zorlyq-zombylyq bolǵan jaǵdaıda, hattama jasaý úshin qazir kýágerlerdiń, aıǵaqtaryna jáne beıne baqylaýǵa súıene otyryp, zorlyq-zombylyq jasaý faktisi boıynsha jábirlenýshiniń aryzynsyz is qozǵaý qarastyrylǵan.

"Biraq osyǵan qaramastan, zorlyq-zombylyqtyń tolastamaýy áıelderdiń quqyǵyn qorǵaý, balalardyń qaýipsizdigin saqtaý zańnamasyn qatańdatýmen birge, qoǵamda qylmysqa múldem tózbeýshilik prınsıpi, zań men tártiptiń qatań saqtalýy dáriptelip, nasıhattalýyn qajet etedi. Sol kezde qabyldanǵan zańdar sapaly oryndalatyn bolady", dedi Súleımenova. 

2021 jyly úıdegi zorlyq-zombylyqtyń sotqa tek 40 paıyzy jetken. Al ondaı abıýzerlerge kóbine keshirim berilip, bosaǵan, al olardyń tek 39 paıyzy ǵana 2 saǵattan 3 táýlikke deıin ákimshilik qamaýda otyrǵan.

– Otbasylyq zorlyq-zombylyq, qatygez patrıarhaldyq ozbyrlyqqa shydamaǵan áıelderdiń jan daýysyn estıtin jáne qatań shara qabyldaıtyn ýaqyt jetti dep bilemiz. Osydan týra bir ǵasyr buryn qazaq halqy damyǵan progressıvti el bolýy úshin áıel teńdigin iske asyryp, qoǵamdaǵy qazaq áıeliniń aýyr jaǵdaıyn sheshýge talpyndy. Qyzdardy bilimge, ónerge úndedi, otbasyndaǵy jónsiz qataldyqty, meıirimsizdikti aıaýsyz áshkereledi. Qazaq áıelderiniń endigi taǵdyry bárimizge tikeleı baılanysty. Otbasyndaǵy zorlyq-zombylyqty toqtatý úshin – birinshi elimizde qundylyqtarǵa negizdelgen mádenıetti qalyptastyrý, ıdeologııany jetildirý, jaýapkershilikti kúsheıtý, eń bastysy zańdy qatańdatý jáne onyń sapaly oryndalýyn júzege asyrýymyz qajet, - deıdi depýtat.

Qyrkúıektiń basynda balalarǵa jáne otbasyndaǵy áıelderge qarsy jasalatyn zorlyq-zombylyqty toqtatý maqsatynda, amanattyq-depýtattar arnaıy zań jobasyn tez arada ázirlegen. Úkimettik emes uıymdar, belsendi ekspertter, memlekettik organdarmen birlesken keńeıtilgen Fraksııa otyrysynda zań jan-jaqty talqylanyp, pysyqtalǵan.

– Eń bastysy, zań jobasynda zorlyq-zombylyq qylmystyq is bolyp tanylady, pedofılder ómirbaqı bas bostandyǵynan aıyrylady, jaýapkershilik pen jaza kúsheıtiledi. Sonymen qatar, bul qujat áıelder men balalardy qorǵaýǵa joǵary jaýapkershilik jáne turmystyq zorlyq-zombylyq jaǵdaılaryna qatań áreket etý tetikterin qarastyrady. Degenmen, nebir «qyńyr múddeli» toptardyń aralasýymen atalǵan zań tujyrymdasyndaǵy normalardy Úkimet qoldamaı otyr. Ártúrli eksperttik ortaǵa salyp, túsiniksiz sebeptermen zań áli Májiliske kelgen joq. О́zimiz jasaǵan, áıelder men balalardy naqty qorǵaıtyn zań jobasyna qajetti qorytyndyny Úkimet sozbalaýda. Sonda taǵy da qanshama áıelderdiń taǵdyryn synǵanyn kútemiz? - deıdi ol.