26 Qazan, 2023 NEWS
"Topyraq sala almaǵanym úshin keshir": Bergeı Rysqalıevtiń anasy qaıtys boldy
Zaman ózgerer, men de elge kelermin...
Foto: Ashyq derekkóz
Atyraý oblysynyń eks-ákimi Bergeı Rysqalıevtiń anasy qaıtys boldy. Bul týraly burynǵy ákimniń ózi feısbýk jelisindegi paraqshasynda jazdy.
"Búgin ómir syılaǵan, jaryq dúnıege ákelgen Anamnan aıryldym...
Mereıimiz tasyǵanda qýanatyn, qıynshylyǵymyzda bizden beter ýaıymdaıtyn Anamyz bul ómirden ótti. Aıyqpas derti týraly bilgen soń «qulyndarym, endi senderdi kórmeıtin shyǵarmyn, qosh bolyńdar!» dep jaqynda ǵana bizdi bir qushaǵyna alyp ketip edi…
«Meni Sáýlebaıdyń qasyna qoıyńdar» dep kózi tirisinde ákemizdiń janyna jerleýdi ósıet etip ketken bolatyn. Sońǵy ósıetin oryndaımyz. Anamyzdy Aqtóbe oblysynda jer qoınyna tapsyramyz.
Qosh bol, Anashym! О́zim kelip, topyraǵyńdy sala almaǵanym úshin keshir… Zaman ózgerer, men de elge kelermin, Sizge de, Ákeme de quran oqytarmyn!
О́mirde tek jaqsylyq jasap, talaı adamǵa qamqor bolǵan, áýletimizdiń uıytqysyna aınalǵan Anamdy Alla Taǵala panasyna alsyn", dep jazdy Bergeı Rysqalıev.
Bergeı Rysqalıev 2006-2012 jyldary Atyraý qalasy men Atyraý oblysynyń ákimi qyzmetin atqarǵan.
- 2013 jyly eks-ákimge "asa iri kólemdegi bıýdjet qarjysyn jymqyrdy jáne jáne qylmystyq top qurdy" degen aıyp taǵylǵan.
- Tergeý bes jylǵa sozylyp, 2019 jyly Qazaqstan soty Bergeı Rysqalıevti 17 jylǵa, aǵasy Armanjan Rysqalıevti 16 jylǵa syrttaı sottaǵan. Olardyń quny mıllıardtaǵan teńge turatyn dúnıe-múlkin tárkilegen.
Alaıda 2020 jyly jazda Qazaqstan soty Bergeı Rysqalıevtiń otbasy men jaqyndarynan tárkilengen múliktiń "bir bóligin" qaıtarý týraly sheshim shyǵarǵan.
Qate tapsańyz, qajetti bólikti tańdap ctrl+enter basyńyz.
Usynylǵandar
Pikir qaldyrý
pikir