Qazaqstanda prezıdenttiń qoldaýymen Dúnıejúzilik kóshpendiler oıyndary ótedi

Astanadaǵy «Qazanat» ıppodromynda ulttyq sport túrlerinen VI festıvaldiń ashylý saltanaty ótti. Aldaǵy 5 kúnde 1300-den astam adam 11 sport túrinen saıysqa túsedi.

Is-sharany ashqan Parlament MájilisinińSpıkeri, «AMANAT» partııasynyń Tóraǵasy Erlan Qoshanov elimizde ulttyq sport túrleri memleket qoldaýymen qarqyndy damyp kele jatqanyn atap ótti.

«Tól mádenıetimizdi dáriptep, ulttyq sportty damytý Memleket basshysy Qasym-Jomart Kemeluly Toqaevtyń árdaıym erekshe nazarynda. Onyń urpaq tárbıesindegi mańyzy týraly Prezıdentimiz kúni keshe Túrkistanda ótken Ulttyq quryltaıda aıtqan edi. Ulttyq sport túrleri – bul bizdiń tarıhymyzdyń jáne qazaq halqynyń ózindik ereksheliginiń aınasy.Ony damyta otyryp, rýhanı muramyzdy bolashaq urpaqtyń ıgili úshin saqtap qalamyz», – dedi E.Qoshanov.

Májilis Spıkeri aldaǵy jyly Qazaqstanda Memleket basshysynyń qoldaýymen ótetinin V Dúnıejúzilik kóshpendiler oıyndarynyń máni men mańyzyna toqtaldy. Birneshe memlekettiń sportshylary bas qosatyn halyqaralyq jarysta qazirgi Qazaqstannyń áleýetin tanytýǵa múmkindik beriledi.

Is-sharanyń ashylý saltanatyna Ulttyq sport qaýymdastyǵynyń prezıdenti Islambek Saljanov qatysty.

Festıval aıasynda aldaǵy bes kúnde sportshylar kókpar, asyq atý, toǵyzqumalaq, jekpe-jek, jamby atý, teńge ilý jáne taǵy da basqa ulttyq oıyn túrinen kúsh synasady.

Is-shara aıasyndaǵy aıtýly oqıǵanyń biri – «JORYQ» at sporty federasııasy osymen eki jyl qatarynan ótkizip otyrǵan «Uly dala joryǵy» respýblıkalyq marafon-báıgesi. Elimizdiń túkpir-túkpirinen arnaıy at basyn burǵan 20 komanda 14 kúnde elordadan Túrkistanǵa deıingi 1300 shaqyrym qashyqtyqty júrip ótedi.

«Báıge-marafon «AMANAT» partııasynyń qoldaýymen byltyr tuńǵysh ret ótkizilgen edi. Bul bolashaqta ulttyq at sporty túrleriniń damýyna aıryqsha áser etetin mańyzdy ári aýqymdy oqıǵa boldy. Dúbirli doda elimizdiń barlyq óńirin biriktirdi. Shabandozdar saıyn saharany atpen sharlap, týǵan jerdiń syryna qanyǵady. Sporttyq jetistikterden bólek, bul báıge etnotýrızmdi damytýǵa jáne halqymyzdyń mádenı murasyn nasıhattaýǵa múmkindik beredi», – dep atap ótti Erlan Qoshanov.

Festıvaldi uıymdastyrýǵa QR Týrızm jáne sport mınıstrligi, Astana qalasynyń ákimdigi, «AMANAT» partııasy, «Samuryq-Qazyna» Ulttyq ál-aýqat qory» AQ, Ulttyq sport qaýymdastyǵy, Týrızm men sportty qoldaý qory uıytqy boldy.