Qańtar oqıǵasy: Beıbit turǵyndy azaptap óltirgen polıseılerge sot úkimi shyqty

Almatyda sot Qańtar oqıǵasy kezinde qala turǵyny Jasulan Anafııaevty ýaqytsha ustaý ızolıatorynda azaptap óltirdi dep aıyptalǵan jeti polıseıge bes jyldan 10 jylǵa deıin túrme jazasyn kesti. Bul – Qańtar oqıǵasynan keıingi azaptaý oqıǵalary boıynsha polıseılerge berilgen eń aýyr jazanyń biri. 

Aıyptalǵan jeti polıseıdiń ekeýi – Aıan Elýbekov pen Mahambet Shynjyrbaev 10 jylǵa, Zakır Ibragımovti 9 Nurlan Torybaev, Ardaq Ázimbekov pen Beıbit Jaqypbaevty 8, Arnat Mıradılovti 5 jylǵa sottaldy.

Tergeý barysynda Jasulan Anafııaevtyń jaqyndary kúdiktilerge taǵylǵan aıyp tym jeńil ekenin aıtqan bolatyn. Jaryssóz kezinde jábirlenýshi taraptyń advokaty Aıman Qurmanbaeva sýdıaǵa aıypty Qylmystyq kodekstiń "azaptaý" babynan "adam óltirý" babyna aýystyrýdy suraǵan edi. Biraq sýdıa ótinishti qabyldaǵan joq.

"Bul jerde adamdy asa qatygezdikpen óltirgen. Onyń saraptamalary bar. Ýaqytsha ustaý ızolıatorynyń beınebaqylaý kameralary óshirilgen. Kýálerdiń jaýaptary bar, qan-qan edendi súrtken, jýǵyzǵan" – dedi isti baqylaǵan quqyqqorǵaýshy Rınat Rıfhat.

Aıyptalýshylar sot prosesi kezinde ózderine taǵylǵan aıypty moıyndaǵan joq, al 7 maýsymda ótken sotta sýdıa jeti polıseıdiń "kinási tolyq dáleldendi" dep málimdedi.

Sot aıyptalýshylarǵa Anafııaevtyń qaryndasy men jaryna 20 mıllıon teńge moraldyq shyǵyndy birigip tóleýdi mindettedi. Sottalýshylar prosess shyǵyndaryn da tóleýi kerek. Úkim ázirge zańdy kúshine engen joq, eki tarap 15 kúnniń ishinde apellıasııalyq shaǵym túsire alady.

Derekkóz: Azattyq radıosy