Májilis depýtattary onlaın platframalardyń jumysyn baqylaýǵa alýdy usyndy

Búgin Májilistiń jalpy otyrysynda depýtattar «Onlaın platformalar jáne onlaın-jarnama týraly» zań jobasyn birinshi oqylymda maquldady. Jıynda Májilis depýtaty Rınat Zaıtov osy zań jobasynyń mańyzdylyǵy men tıimdiligi jaıynda sóz sóıledi. 

«Negizi bizde halyqqa zııan zań shyqpaıdy. Biraq oryndalýyna baılanysty Ishki ister mınıstrligine ótinishim bar. Osy zań shyqqan keıin «áý» dep aýzyn ashqan qazaqtyń aýylymda jaǵdaıym joq dep aıtqandarǵa qarsy qoldanylyp ketpese eken deımin,» – dedi depýtat.

Rınat Zaıtovtyń aıtýynsha, jalpy qazirgi tańda onlaın-platformalarda birneshe jalǵan aqparat berýden bólek, jalǵan jarnama taratý, jalǵan dáristeý kýrstaryn ashyp halyqty tikeleı zań buzýshylyqqa tárbıeleý (azamattardyń úılerinen shyqpaı tenderlerden paıda tabýy sııaqty), kóptegen tanymal adamdardyń attarynan akaýnt ashyp, onlaın lotereıalar ótkizý jáne solardyń atynan jalǵan aqparat taratý sııaqty zańsyz is-áreketter keńinen beleń alyp barady.

«Ol az deseńizder elimizde teris dinı aǵymǵa kirýdiń barlyǵy osy onlaın platformalar arqyly júredi. Bizdiń eshqandaı memlekettik arnamyz teris dinı aǵymǵa tárbıelemeıdi», – dedi.

Depýtat atap ótkendeı, atalmysh zań jobalary osyndaılardyń bárin aýyzdyqtap,  júgendeýdiń birden-bir joly. Sondyqtan, bul zań jobalaryn qazirgi ýaqyt talabyna saı dep tanyp, birinshi oqylymda qoldaýǵa shaqyrdy.