"10 jyl merzimge turýǵa ruqsat": Shildeden bastap etnıkalyq qazaqtar úshin «Ata joly» kartasy iske qosylady

2023 jyldyń shildesinen bastap ózge elde turatyn etnıkalyq qazaqtar «Ata joly» kartasyn alyp, Qazaqstanǵa ońaılatylǵan kirý múmkindigin paıdalana alady. «Ata joly» kartasynyń ıegerleri elge kirgen kezde 10 jyl merzimge turýǵa ruqsat alady, dep jazady Qamshy.kz aqparat agenttigi. 

Eńbek jáne halyqty áleýmettik qorǵaý mınıstrliginiń málimetinshe, «Ata joly» kartasyn engizýdiń maqsaty tarıhı otanmen baılanysty nyǵaıtý, ulttyq dástúrlerdi saqtaý, Qazaqstanda olardyń áleýetin iske asyrý úshin bizdiń elimizge kásipqoılar men tabysty bıznesmenderdi tartý bolyp tabylady. Karta shetelde turatyn etnıkalyq qazaqtarǵa azamattyǵyn saqtaı otyryp beriletin bolady. «Ata joly» kartasynyń ıegerleri elge kirgen kezde 10 jyl merzimge turýǵa ruqsat alady.

«Ata joly» kartasy bar etnıkalyq qazaqtyń kandastardan aıyrmashylyǵy – ol basqa eldiń azamaty bola tura Qazaqstan Respýblıkasynyń azamattarymen jáne kandastarymen teń quqyqqa ıe.

«Ata joly» kartasynyń ıegeri:

•  medısınalyq kómektiń kepildik berilgen kólemi sheńberinde medısınalyq mekemelerde áleýmettik tólemder men qyzmet kórsetý;
•  QR Eńbek kodeksine jáne «Halyqtyń kóshi-qony týraly» QR Zańyna sáıkes QR aýmaǵynda jumysqa ornalasý;
•  Qazaqstan aýmaǵynda Kásipkerlik kodekske jáne QR ózge de quqyqtyq aktilerine sáıkes kásipkerlik qyzmetti júzege asyrý;
•  QR «Bilim týraly» Zańyna sáıkes memlekettik bilim berý uıymdarynda tegin orta bilim, memlekettik orta arnaýly jáne/nemese joǵary oqý oryndarynda konkýrstyq negizde tegin orta arnaýly jáne/nemese joǵary bilim alý, jeke oqý oryndarynda aqyly bilim alý;
•  «Advokattyq qyzmet jáne zań kómegi týraly» QR Zańyna sáıkes memleket kepildik bergen zań kómegin alý;
•  Qazaqstan Respýblıkasynyń azamattyǵy salasyndaǵy halyqaralyq sharttarǵa jáne QR zańnamalyq quqyqtyq aktilerine sáıkes jeńildetilgen tártippen Qazaqstan Respýblıkasynyń azamattyǵyn alý quqyǵyn paıdalana alady.

«Ata joly» kartasy bar adamdardyń QR memlekettik organdary men jergilikti ózin-ózi basqarý organdaryna saılaýǵa jáne saılanýǵa, respýblıkalyq referendýmǵa qatysýǵa quqyǵy joq jáne memlekettik qyzmetke kire almaıdy.

Budan basqa eger «Ata joly» kartasynyń ıesi Qazaqstan azamattyǵyn alǵan jaǵdaıda onyń kartasy jaramsyz dep tanylady.

«Ata joly» kartasynyń ıegerleri eńbek qyzmetin júzege asyrý nemese bıznes júrgizý úshin qonystaný óńirin óz betinshe tańdaıdy. «Ata joly» kartasyn alýdyń algorıtmi týraly qosymsha habarlanatyn bolady.