"Atylǵandardy top–tobymen kóme bergen": Repressııa qurbandarynyń súıegi áli de tabylyp jatyr

Almaty oblysy Jańalyq aýylynda qazba jumystarynyń nátıjesinde saıası qýǵyn–súrginge ushyrap, atý jazasyna kesilgen azamattardyń súıegi áli de tabylyp jatyr. 

2018 jyly Jańalyq aýylynan 56 adamnyń qańqasy tabylǵan bolatyn. Olar 1 metrden sál ǵana asatyn tereńdikte kómilgen. Qazba jumystary kezinde mamandar tereń kómilmegen jerde adamǵa tıesili tize, jaýyryn men qabyrǵa súıegin tapqan. Sonymen qatar, bul aýmaqta osyǵan deıin adamdardyń bas súıegi, tiri kezinde qoldanǵan zattary jáne dene qańqalary qazyp alynǵan.

"Úsh–tórt domalaq kózildirik tabyldy. Múshtik, teriden tigilgen mási bar. Jaı adamdardyń zattary emes. Bir-birine qatyp qalǵan, salmaǵy 1-2 kg gılza bar. Báriniń jelkesi tesik", – dedi Jańalyq aýylynyń turǵyny Murat Qyrǵyzbaıuly.

Búginde 50 den asa adamnyń denesi tabylǵan jerde resmı zertteý bastaldy. Arheologtardyń paıymdaýynsha, atylǵan adamdar top–tobymen osy aýmaqqa kómilgen.

"Postkeńestik memleketter men Reseıde izdeý–barlaý jumystary júrgiziledi. Al Qazaqstanda qýǵyn–súrgin qurbandaryn alǵash zerttep otyr", – dedi zertteý tobynyń aǵa ǵylymı qyzmetkeri, arheolog Baýyrjan Beısetaev. 

Ár jyldary tabylǵan súıekterdiń saqtalý deńgeıi de ár túrli. Qyrǵa kómilgen deneler saıda kómilgen denelerden qaraǵanda áldeqaıda jaqsy saqtalǵan. Mamandar buǵan aýa temperatýrasy men jerdiń ylǵaldylyǵy áser etken, dep túsindirdi.

"Úsh–tórt kún buryn osy jerde barlaý jasadyq. Almaty ózeniniń sol jaǵynan da, oń jaǵynan da qazylǵan or bar. Negizinen, sol shuńqyrdy paıdalanyp sarbazdar oqý–jattyǵý ótkizdi me eken dep oılaımyz. Qaraımyz dep belgilep qoıǵan 20 núkte bar", – dedi zertteý tobynyń ǵylymı qyzmetkeri Rýslan Sherbaev.

Jańalyq aýylynda tabylǵan adam qańqasynyń jasy shamamen 168 jyl. Bıylǵy zertteýde bul qatarǵa taǵy birshama materıal qosylady. Arheologtardyń boljamynsha, aýyl mańynda 2 myńǵa jýyq repressııa qurbany jerlengen bolýy múmkin. 

Derekkóz: Almaty.tv