Erkin Tátishev AlmaU ýnıversıtetiniń Qamqorshylyq keńesiniń tóraǵasy atandy

29 Mamyrda AlmaU Qamqorshylyq keńes músheleriniń qatary jańa tulǵalarmen tolyqty. VII shaqyrylǵan QR Parlamenti Májilisiniń depýtaty, AlmaU Joǵary bıznes mektebiniń (MVA jáne DBA baǵdarlamalary) túlegi, «ASPARA MUNAY» JShS Bas dırektory Lınnık Andreı, BUU Jahandyq shartynyń Qazaqstandaǵy ókili, Stenfordta oqyǵan alǵashqy qazaq, sondaı-aq turaqty damý jáne ESG taqyryby boıynsha sarapshy Seıdjaparova Dınara jáne Altyn Samruk Qazaqstan SEO-sy, QR premer-mınıstriniń keńesshisi, sondaı-aq QR iri holdıngter men kompanııalardaǵy joǵary býyn basshysy, Nazarbayev University & Duke's Fuqua Business School EMBA baǵdarlamasynyń túlegi Pazylhaıyr Gúlbaný – endi Qamqorshylyq keńes músheleri.

Sonymen qatar Qamqorshylar keńesiniń tóraıymy Janat Berdalına basqarý tizginin 10 jyl boıy keńes múshesi bolǵan Erkin Tátishevke tapsyrdy. «Men 6 jyl boıy QK tóraǵasy, 9 jyl QK múshesi boldym. Endi tizgindi tapsyratyn kez keldi», - dedi Janat Berdalına.

Janat Qolanqyzy Qamqorshylar keńestiń jáne jalpy ýnıversıtettegi korporatıvtik basqarýdyń damýyna eleýli úles qosty. Endigári ol – Almaty Menedjment ýnıversıtetiniń Qamqorshylar keńesiniń qurmetti múshesi.

«Eń qıyny – jańa nárse oılap tabý. Biz joǵary bilim transformasııa, ınnovasııa prosesinde ekenin túsinemiz. Qazir resýrstary bar úlken ýnıversıtetter de qınalyp jatyr. AlmaU úshin de «Biz kimbiz? Qaıda baramyz?» degen suraq ózekti bolýy shart. Áreket jasap, baıqap kórýden qoryqpaıtyn oqý orny bolaıyq. Bul degenimiz – jańa ádistemeler, jańa nusqalar, jańa tásilder», -dep atap ótti ýnıversıtettiń Qamqorshylyq keńesiniń jańa tóraǵasy Erkin Tátishev.

Qamqorshylar keńesi ýnıversıtettiń damýynda mańyzdy ról atqarady. Ol ýnıversıtetti basqarýdyń joǵarǵy organy jáne negizgi máseleler boıynsha sheshim qabyldaýǵa jaýap beredi. Sonymen qatar strategııalyq maqsattardy aıqyndaıdy jáne negizgi qarjylyq qujattardy bekitedi.