"Vagnerge" jaldanyp, Reseıdiń atynan soǵysqan qazaqstandyq Ýkraınada 9 jylǵa sottaldy

Ýkraına soty 23 jastaǵy qazaqstandyq  Shyńǵys Seıpıevti "áskerge jaldaný qylmysyna" qatysty is boıynsha toǵyz jylǵa sottady. Bul týraly Gratı ýkraın basylymy sot úkimine súıene otyryp habarlady.

Is materıaldaryna sáıkes, 2022 jylǵy qazanda Seıpıevti "Vagner" jekemenshik áskerı kompanııasy Ýkraınaǵa qarsy soǵysýǵa kóndirgen. 18 qarashada ony ushaqpen Túmennen Rostov oblysyna jetkizgen. Sol jerde ol kelisimshartqa qol qoıǵan. Áskerı kompanııa oǵan aı saıyn 200 myń rýbl tóleýge ýáde bergen. Seıpıev aqshany kelisimshart merzimi aıaqtalǵan soń alýǵa tıis bolǵan.

Jeltoqsannyń basyna deıin Seıpıev áskerı daıyndyqtan ótken, odan soń Lýgansk oblysynyń Kremennaıa qalasyna barǵan. 24 jeltoqsanda ony Donesk oblysy Bahmýt aýdanynyń Iаkovlevka aýylyna jibergen. Sol jerde ol bir apta soǵysqan, al 30 jeltoqsanda tutqynǵa túsken.

Tergeýdi Ýkraına qaýipsizdik qyzmeti júrgizgen. Tergeý nusqasyna qaraǵanda, Seıpıevti Túmendegi №2 kolonııada soǵysqa barýǵa úgittegen. Ol Reseıde zorlaý qylmysy boıynsha 10 jylǵa sottalyp, dál sol ýaqytta jazasyn ótep júrgen. "Vagner" áskerı kompanııasymen jasalǵan kelisimshart boıynsha oǵan syıaqy tólenip, qylmystyq jazadan bosatý týraly jazylǵan.

"Vagner" áskerı kompanııasy 2022 jylǵy jazdan beri kolonııada jazasyn óteýshilerdi soǵysqa úgitteýmen aınalysyp kelgen. Kompanııanyń negizin qalaǵan Evgenıı Prıgojın kolonııalardy ózi aralap, asa aýyr qylmys jasaǵandardy Ýkraınaǵa qarsy soǵysýǵa kóndirgen. Alaıda 2023 jylǵy aqpanda Prıgojın sottalǵandardy úgitteý toqtady dep málimdegen.

Qańtardyń basynda Prıgojın birinshi top raqymshylyqqa ilingenin habarlaǵan. "Agentstvo" basylymy men BBC Orys qyzmetiniń jýrnalısteri raqymshylyq alǵandar arasynda urlyq-qarlyq, esirtki saýdasy, kisi óltirý qylmystary úshin sottalǵandar bar ekenin anyqtaǵan.

Mamyrda "Vagner" jekemenshik áskerı kompanııasy Ýkraınadaǵy soǵysta 20 myń jaldamaly jaýynger opat bolǵanyn, onyń jartysy sottalǵandar ekenin málimdegen.

Derekkóz: Azattyq radıosy