1 shildeden bastap birneshe áleýmettik tólem mólsheri ósedi

Prezıdent Qasym-Jomart Toqaevtyń tapsyrmasyna sáıkes 1 shildeden bastap memlekettik áleýmettik saqtandyrý qorynan tólenetin eńbek etý qabiletinen jáne asyraýshysynan aıyrylýyna baılanysty beriletin áleýmettik tólemderdiń mólsheri 14,5%-ǵa ulǵaıtylady. Premer-mınıstr Álıhan Smaıylov úkimettiń tıisti qaýlysyna qol qoıdy.

 

Eńbek etý qabiletinen aıyrylýyna baılanysty áleýmettik tólemdermen 92 myńǵa jýyq adam, asyraýshysynan aıyrylýyna baılanysty beriletin áleýmettik tólemdermen 61 myń otbasy qamtylady dep josparlanyp otyr.

 

Osy qaýly 2023 jylǵy 1 shildeden bastap qoldanysqa engiziledi jáne resmı jarııalanýǵa jatady.

 

Memleket azamattardyń tabysyn arttyrý boıynsha is-sharalardy turaqty negizde qabyldap kele jatqanyn aıta ketý kerek. Mysaly, bıyl 1 qańtardan bastap respýblıkadaǵy eń tómengi eńbekaqy mólsheri 60 myńnan 70 myń teńgege deıin kóbeıtildi. Bul ekonomıkanyń barlyq salasynda jumys isteıtin 1,8 mln-ǵa jýyq jaldamaly jumysker men eńbek adamyn qamtydy. Eń tómengi aılyq kórsetkishi arqyly eńbekaqy deńgeıin belgileıtin uıymdar biliktiliktiń sanat aralyq júıesin eskere otyryp, ózge de sanattaǵy jumysshylardyń eńbekaqysyn ósirý jaǵyna qaraı qaıta qarastyrady.

Bıyl 4,4 mln adam alatyn zeınetaqy men járdemaqynyń barlyq túri qaıta esepteldi.

Sonymen qatar dárigerlerdiń, muǵalimderdiń, bıýdjettik salanyń basqa da qyzmetkerleri men óndiris jumysshylarynyń jalaqysyn kezeń-kezeńmen arttyrýdy jáne joba aýqymyn keńeıtý boıynsha 2025 jylǵa deıingi halyqtyń tabysyn arttyrý baǵdarlamasyn júzege asyrý jumystary jalǵasyn tapty. Sondaı-aq shaǵyn nesıelerdi qoljetimdi etý arqyly aýyl turǵyndarynyń tabysyn arttyrý boıynsha jobany keńeıtý jumystary bastaldy.