Psıhıkalyq densaýlyq ortalyǵynyń emdelýshileri ashtyq jarııalady

Pavlodar oblysynda psıhıkalyq densaýlyq ortalyǵynyń 16 emdelýshisi ashtyq jarııalaǵan. 

"Sot sheshimimen májbúrli túrde psıhıkalyq densaýlyq ortalyǵynan em alyp jatqan 16 adam tamaqtan bas tartty",– dep habarlady Pavlodar oblysynyń densaýlyq saqtaý basqarmasy.

Oblystyq psıhıkalyq densaýlyq ortalyǵynyń basshysy Qahan Imanbekovtyń aıtýynsha, emdelýshiler medısınalyq demalys talap etken. Alaıda 2020 jyldan bastap Qazaqstan Respýblıkasy Densaýlyq saqtaý mınıstriniń buıryǵyna sáıkes sot sheshimimen alkogol men nashaqorlyqtan májbúrli túrde emdelip jatqan naýqastardy demalysqa shyǵarýǵa bolmaıdy.

Buryn naýqastar medısınalyq demalys alyp, biraz ýaqytqa bosatylatyn.  Biraq olardyń eshqaısy emhanaǵa qaıta oralmaǵan, dep habarlady KazTAG aqparattyq agenttigi.

Sonymen qatar, emdelýshiler ortalyqtaǵy tamaqqa syn aıtqan. Qahan Imanbekov bir naýqasqa beriletin bes mezgil tamaq quny 1123 teńge turatynyn atap ótti. Bul aýrýhanalar úshin eń joǵary kórsetkishterdiń biri.

Kelissózderden keıin ashtyq jarııalaǵan 16 adamnyń beseýi tamaq ishe bastaǵan.