Inga Imanbaı: Ermurat Bapıdyń senimdi ókilderiniń biri Álı Ǵanı – ákimshilik qyzmetkeri

Erlan Qarınniń tizimindegi kandıdattarǵa úgit-nasıhat  júrgizýge ákimshilik kómektesip otyrǵan. Bul týraly saılaý nátıjesine qarsy ótkizilip jatqan baspasóz konferensııasy kezinde Inga Imanbaı habarlady. 

"Qazir prezıdent famılııasy aýysqanymen biz Toqaev basqaratyn Nazarbaev júıesinde ómir súrip jatyrmyz. Buǵan osy saılaýda anyq kózimiz jetti. Aldyn ala Qarınniń tizimimen belgilengen kandıdattarǵa úgit-nasıhatty ákimshilik júrgizgenin de dáleldedik. Saılaý kúni bizdiń senimdi ókilderimizdi polısııamen syrtqa shyǵaryp jibergen. Saılaý aıaqtalǵan soń meniń senimdi ókilim hattamalardy fotoǵa túsirip, maǵan jiberdi. Ony polısııa kúshtep shyǵaryp jibergen de, meniń hattamamnyń sanyn tórteý dep kórsetken. Negizi tórtten áldeqaıda kóp edi. Sol jas jigit shtabqa túngi saǵat 3:00-te "Inga, sizdiń daýsyńyzdy qorǵaı almadym" dep jylap keldi", dedi Inga Imanbaı. 

Onyń aıtýynsha saılaý qorytyndysyn joqqa shyǵarý kerek. 

"Jańa Qazaqstan, Ádiletti Qazaqstan dep ataýdy ózgertti. Alaıda bıylǵy saılaýdyń burynǵydan aıyrmashylyǵy qandaı? Psevdooppozısııa ókilderin jarysqa qosty. Ne úshin? Batys elderine saılaýdyń ádiletti ótkenin aıtý úshin osyndaı qadamǵa bardy. Tipti ákimshiliktiń ózi psevdooppozısııa ókilderine úgit-nasıhat jasaýǵa kómektesti", dep pikir bildir ol.

Sonymen qatar Inga Imanbaı saılaýda jeńiske jetken Ermurat Bapıge qatysty da pikir bildirdi: 

"Úgit-nasıhat kezinen bastap bılik Erlan Qarınniń tizimin ashyq túrde nasıhattady. Ermurat Bapıdyń senimdi ókilderiniń biri Álı Ǵanı – ákimshilik qyzmetkeri. Onyń da qujaty bizde bar. Budan artyq qandaı dálel kerek? Sol sebepti biz saılaý qorytyndysyn moıyndamaýymyz kerek. Bılikke qoıar birinshi talabymyz saılaý nátıjesin joıý bolsa, ekinshisi jańa zańdarmen saılaý ótkizýge kelisý".