Gúlmıra Satybaldy tergeý kezinde Qazaqstannan ketip qalmaq bolǵan

Nursultan Nazarbaevtyń jıeni Qaırat Satybaldynyń burynǵy áıeli Gúlmıra Satybaldy sotqa deıingi tergeý barysynda Qazaqstannan ketip qalmaq bolǵan, dep málimdedi prokýror Almıra Qojahmetova. Bul týraly KazTAG jazdy. 

Buǵan deıin advokat Ásel Rabatova Gúlmıra Satybaldyǵa qatysty bultarpaý sharasyn jeńildetýdi suraǵan bolatyn.

"Gúlmıra Satybaldynyń qamaýǵa alynǵanyna bir jyldan asty. Áıel adam retinde oǵan tolyqtaı oqshaýlaný qıyn. Bes nemereli áje, minezi jaqsy, turaqty turatyn jeri bar. Aldyn-ala shaqyrtý boıynsha barlyq sot otyrystaryna qatysýǵa daıyn, sondyqtan bultartpaý sharasyn úıqamaqqa nemese kepilge aýystyrýyńyzdy suraımyz", - dedi Rabatova.

Biraq prokýror Gúlmıra Satybaldy sotqa deıingi tergeý ýaqytynda elden ketpek bolǵanyn, sol sebepti bultartpaý sharalaryn jeńildetý múmkin emesin aıtty.

Eske sala keteıik Gúlmıra Satybaldy 2017 jylǵy Ýnıversıada nysandaryn jóndeýge arnalǵan qarajatty jymqyrdy, adam urlaý jáne reıderlikpen aınalysty degen kúdikpen aıyptalǵan bolatyn.