Qantym Ǵumarova: Bir aıaǵymnan aıyrylyp, aýrýhanada jatqanda da qolónerdi tastamadym

Áıelder qaýymyn kóbi "názik jandylar" dep atap jatady. Alaıda bir qolymen besikti, bir qolymen álemdi terbeýge áıeldiń ǵana kúshi jetetin sekildi. Elimizde taǵdyr soqqysyna moıymaı, basqa túsken qıyndyqty eńserip júrgen aıaýly jandar az emes. Sondaı áıelderdiń biri  jol aparytyna túsip, bir aıaǵynan aıyrylsa da tiginshilikpen aınalysyp, aınalasyna syıly bolǵan Qantym Ǵumarova.  Qamshy.kz aqparat agenttigine bergen suhbatynda Qantym Ǵumarova taǵdyr synaǵynan qalaı synbaı ótkeni jóninde baıandap berdi. 

– Siz tiginshilikti kimnen úırendińiz? Tiginshilikti kásipke aınaldyrý týraly oı qashan keldi?

– Bala kezimnen tigin tigýge ıkemim boldy. Marqum anamnyń da ismerligi bar edi. Alǵash ret sol kisi úıretti. 10 jasymda jol apatyna  tústim, qate emdelip, 14 jyldan keıin onkologııaǵa ushyradym. Polıgon aımaǵynda ómirge kelippin, denemde radıasııa bar eken. Sońynda aıaqtan aıyryldym. Jumysqa jaramsyz bolyp qalǵan soń tiginmen aınalysýdy qolǵa aldym.

– Basyńyzǵa túsken qıyndyqqa moıymaıtyn erik-jigerdi qaıdan aldyńyz?

– Basyma qıyndyq túskende meni jigerlendirip, ómirge yntalandyrǵan almatylyq onko-ınstıtýttaǵy emdeýshi professory, dosentteri men meıirbıkeleri boldy. Ol kisilerge myń alǵys aıtamyn. Men ol kezde 24-jasta edim. Qatty qınalǵanyma qarap aıaýshylyq tanytqan bolýy kerek. Aıaǵymnan aıyrylyp, aýrýhanada  jatqanda da osy isimdi jalǵastyrýǵa kómektesti. Keıinnen em-dom alyp jatqan kezde de qolónerden qol úzgen joqpyn. Aıaǵymnan aıyrylǵan kezde jer betinde menen basqa múgedek adam joq dep oılaǵan edim. Qatelesippin. Eki qoly men bir aıaǵy joq adamdardy kórgen kezde táýbeme keldim, óz-ózime erik-jiger berdim. 

– Sońyńyzdan eretin shákirt tárbıeleý oıyńyzda bar ma? 

– Árıne, shákirt tárbıeleýge bolady, biraq qazirgi jastar daıynǵa umtylady. Kóbi "Qolóner qıyn eken, taza matematıka ǵoı" deıdi. Úırenem dep kelgen kisige esigim árqashan ashyq.

– Qazirgi jastarǵa qandaı keńes beresiz?

– Jumys joq dep syltaýratatyn jastar kóp. Basyna qıyndyq túse qalsa, ataýly áleýmettik kómek alýǵa ǵana umtylady. Sondyqtan, meniń oıymsha áleýmettik kómekti toqtatyp, qoldaryna qarmaq ustatý kerek. "Eńbek etseń erinbeı toıady qarnyń tilenbeı" dep atalarymyz durys aıtqan. Jastardy bala kezden eńbekke baýlýmyz kerek dep oılaımyn.