Qonaev qalasyndaǵy temir jol júıesi qalanyń syrtyna shyǵarylady – Marat Qarabaev

QR Indýstrııa jáne ınfraqurylymdyq damý mınıstri Marat  Qarabaev Almaty oblysyna sapary barysynda óńirdegi birqatar nysandardyń jumysymen tanysty. Sonymen birge, Qonaev qalasynda sala ókilderimen bas qosyp, keleli keńes ótkizdi dep habarlaıdy óńirlik baspasóz qyzmeti.

Aldymen Marat  Qarabaev Almaty oblysyndaǵy qurylysy júrip jatqan «TehnoNıkol-Ortalyq Azııa» JShS-ne tıesili nysandardy aralady.

Vedomstvo basshysy aıaldaǵan alǵashqy nysan Talǵar aýdanyndaǵy «Qaırat» ındýstrıaldy aımaǵy boldy.

198,3 gektar aýmaqty alyp jatqan ındýstrıaldy aımaqta 12 kásiporyn ornalasqan. Olarǵa 104 mlrd teńge ınvestısııa tartý josparlanǵan. Nátıjesinde 2563 jumys orny qurylady dep kútilýde.

Mamandardyń aıtýynsha, aǵymdaǵy jyly 6 kásiporynnyń qurylys jumystary júrip jatyr. Sonyń ishinde bıyl 3 birdeı zaýytty iske qosý josparlanǵan. Aıta keteıik, ındýstrıaldy aımaqtaǵy úsh taǵandy ınfraqurylymmen qamtý jumystary jekemenshik seriktestik aıasynda júrgizilip jatyr.

Zaýyt qurylysyna 321 adam jumyldyrylǵan. Bas merdiger – «Dıal-Stroı» JShS.

Aǵymdaǵy jyly shilde aıynda ǵımaratty jylytýǵa arnalǵan qurylys materıaldaryn shyǵaratyn zaýytty qoldanysqa berý kózdelgen.

Sý jańa zaýyttyń  alyp jatqan jer kólemi 30 gektardy quraıdy. Kásipkerlerdiń qolyn baılap otyrǵan másele, ınfraqurylymmen tikeleı baılanysty. Zaýyt basshylyǵy osyǵan qatysty mınıstrlikten qoldaý kórsetýin surady. Marat Kárimjanuly bul máseleni oblys ákimdigimen birlesip, sheshimin shyǵaratynyn aıtty.

Mınıstr bet burǵan kelesi nysan Zarechnyı aýylyndaǵy «Dorplast-ınvest» JShS boldy.

«Dorplast-invest Production Company» JShS – turmystyq jáne óndiristik maqsattaǵy polımer buıymdaryn shyǵaratyn zamanaýı, qarqyndy damyp kele jatqan kásiporyn. «QTJ» UK» AQ kásiporyndary úshin jol qurylymynyń elementteriniń jetekshi jetkizýshisi bolyp tabylady.

Bul óndiris oshaǵyndaǵy jyldyq ónim kólemi mólsheriniń tómendeýi, otandyq ónimge degen naryqtaǵy suranystyń azaıýy búgingi kúni zaýyttyń jumysyn kenjeletip tur. Artýr Hachatrıannyń ýájin tyńdaǵan vedomstvo basshysy ony jeke qabyldaýyna jazyp aldy, suraq aýqymdy bolǵandyqtan jaýapty sala ókilderimen birge otyryp talqylaýǵa shaqyrdy.

«Buǵan qatysty keńinen talqylaý qajetpiz. Sizderdi beısenbi kúni jeke qabyldaýymda kútemin. Sol jerde aqyldasaıyq» dedi Marat Qarabaev.

Kúnniń alǵashqy bóliginde qos kásiporynnyń jaı-kúıimen tanysqan Marat Kárimjanuly oblystyq ákimdik ǵımaratynda óńirdegi basqarma basshylary jáne salalyq kásipkerlermen, sondaı-aq óńir turǵyndarymen kezdesý ótkizdi.

Bas qosýda alǵash bolyp sóz alǵan Almaty oblysynyń ákimi Marat Eleýsizuly, mınıstrdiń bul is-sapary aımaq úshin asa mańyzdy ekenin, aýqymdy jobalardy jandandyrýǵa úles qosatynyn tilge tıek etti.

Artynsha, kásipkerlik jáne ındýstrıaldy-ınnovasııalyq damý basqarmasynyń basshysy Qýanysh Baqytuly baıandama jasady.

Ol óz sózinde, oblysta jalpy aýdany 1,5 myń ga bolatyn 4 ındýstrıaldy aımaq baryn, onda quny 140 mlrd. teńgeniń 13 jobasy iske asatynyn aıtty. Alaıda bul mańdy jaryq pen sýmen jabdyqtaý jumystary tolyq júrgizilmegen. Osyǵan baılanysty qarjylyq qoldaý kórsetýdi surady.

Mınıstr óz kezeginde qajetti qujattardy jyldam daıyndaý kerektigin eskertti. Úlgermegen jaǵdaıda ınrfaqurylymdy qarjylandyrý 2024 jylǵa qaldyrylatynyn ashyp aıtty.

Jıynda sóz bolǵan kelesi másele, kúre joldyń taǵdyryna baılanysty boldy.

Almaty oblysy jolaýshylar kóligi jáne avtomobıl joldary basqarmasynyń basshysy Almas Batanov salaǵa qatysty statıstıkany sóıletip, máseleni ortaǵa saldy.

Almas Batanov mınıstrge qazirgi ýaqytta QR Indýstrııa jáne ınfraqurylymdyq damý mınıstrligi "QTJ" AQ atynan Almaty stansııasynyń temirjol torabyn aınalyp ótip, "Jetigen-Qazbek-Bek" aınalma temirjol jelisin salý jobasyn iske asyryp jatqanyn jáne ózi basqaratyn basqarma oblys ortalyǵynyń bas josparynda kózdelgen Qonaev qalasyn aınalyp ótetin tranzıttik temirjoldy kóshirý máselesin pysyqtap jatqanyn aıtty.

«2 strategııalyq mańyzdy jobalardy damytý úshin biz joǵaryda atalǵan jobalardyń kólik ınfraqurylymy negizinde Almaty oblysynda mýltımodaldy kólik-ındýstrııalyq-saýda habyn qurýdyń tujyrymdamalyq josparyn iske asyrý boıynsha jumys tobyn jasaqtadyq. Osy jobany iske asyrýǵa baılanysty máselelerdi jan-jaqty sheshý úshin, eger siz bizdiń jumys tobymyzǵa mınıstrlik ókilin qosyp berseńiz jaqsy bolar edi» dedi Almas Batanov.

«Almaty oblysynyń ortalyǵy Qonaev qalasynan ótetin temir joldy qalanyń syrtyna shyǵarý máselesin kóretip otyrsyzdar. Búgingi kúni Qonaev qalasynyń damý jospary ázirlenýde. Jalpy temir jol júıesin qalanyń syrtyna shyǵarýǵa kelisemiz. Biraq ekinshi másele tur. Bul Almaty qalasynyń aınalma temir jolyn qurý máselesi bar. Oǵan qatysty tehnıkalyq-ekonomıkalyq negizdemeni jasap bastadyq. Endigi suraq, osy jobanyń sheńberinde jasaımyz ba, álde jeke joba retinde qarastyramyz ba?

Bizdiń oıymyzsha bul jeke joba bolady. О́ıtkeni, Qonaev qalasynyń ishinen temir joldy shyǵaramyz dep qoldaǵy jobany toqtatyp qoımaýymyz qajet. Ekinshiden, Qonaevtaǵy temir jolǵa qatysty jumysqa jeke ınvestorlar óz qyzyǵýshylyǵyn bildirip otyr. Bul iske qatysty áli de taldaý júrgiziletin bolady» dedi mınıstr Marat Kárimjanuly.

Kezdesý barysynda oblystyq qurylys basqarmasy basshysynyń mindetin atqarýshy Aıan Sábıtuly merdigerlerden daıyn úı satyp alýǵa qatysty oıyn bildirip, bul usynysty qoldaýyn surady.

Mınıstr bul oıdy quptap, aldaǵy ýaqytta oblys ákimdikteri merdiger kompanııalardan úılerdi óz balansyna ótkizý úshin satyp alatynyn aıtty.

Al jalpy bıylǵy jyly jaldamaly turǵyn úıge 100 mlrd.teńge, «Baqytty otbasy» jáne «Shańyraq» bardarlamasyna 163 mlrd. teńge qarastyrylǵan.

Aımaqtaǵy basqarma basshysynyń óz aýzynan túıitkildi máseleni estip, oǵan óz tarapynan tushymdy jaýap bergen Marat Qarabaev Qarasaı aýdany, Abaı aýylynda ornalasqan «KZ Recycling» JShS-gin betke aldy.

2003 jyly ashylǵan kásiporyn Ortalyq Azııadaǵy qaǵaz ónimderi men gofrlengen kartonnyń iri óndirýshisi bolyp tabylady. Munda 842 adam eńbek etedi. Jylyna 100 myń tonna 50 túrli ónim shyǵarady.

Zaýyt basshylyǵynyń endigi armany óndiriske qajet qurylǵylardy alý. Oǵan 10 mln. 183 myń  eýro qarjy qajet. Aıtýlarynsha kásipkerlikti damytý qoryna lızıngke ótinish bergen.

Qorap óndirisin kózben kórgen QR Indýstrııa jáne ınfraqurylymdyq damý mınıstri temir-beton shyǵaratyn «PK Altyn Taǵa» JShS-ne bardy.

О́ndiris aılaǵynda 29 bloktan turatyn zaýyt qurylysy júrgiziledi. Búgingi kúni munda 8 nysan salynyp jatyr. Qazirgi kezde kompanııa basshylyǵy qurylysqa 40 mlrd.teńgeden astam qarjy jumsaǵan. Qalǵan nysandardy salý úshin memleketten qoldaý qajet ekenin alǵa tartty.

«Kásipkerlikke qoldaý kórsetý bizdiń basty mindetimiz. Sizder bizge qansha qarjy kerek ekenin naqty eseptep berseńizder. Biz qarastyraıyq. Bir aıta keterligi bul qarjyny sizderge 9 paıyzdyq mólsherlemen nesıe retinde berýdi qarastyrýǵa bolady» dedi mınıstr Marat Qarabaev.

Odan shyǵyp, Marat Kárimjanuly eldegi jalǵyz «Almaty turmystyq tehnıka zaýytyna» bardy. Zaýyt negizinen gaz jáne elektr plıtasy, as úı sorǵyshyn shyǵarady. Aldaǵy ýaqytta televızor jáne kir jýatyn mashına shyǵarýdy qolǵa almaq. Búgingi kúni jyldyq qýaty 50 myń ónim óndirýge qaýqarly, keler jyly bul kórsetkishti 100 myńǵa jetkizý kózdelgen.

Sonymen qatar, ár úsh jyl saıyn zaýyttyń qurylymyn keńeıtip, qosymsha kásiporyn ashý josparlanǵan. Aıta keteıik, «Almaty turmystyq tehnıka zaýytynyń» eń bir ereksheligi mundaǵy mamandardyń barlyǵy jergilikti turǵyndar.