«Týrıstik alym – salany damytady»

Týrıstik qyzmetter naryǵynyń mamandary týrıstik alym (Bed Tax) alý tájirıbesin engizý týrıstik salany damytýǵa, ınfraqurylymdy jetildirýge kómektesedi dep sanaıdy.

2023 jylǵy 17 qańtarda Almaty qalasynyń máslıhaty týrıstik alym kólemin qonaq úı qunynyń 5% deńgeıinde belgiledi. Qazir týrıstik jarna elimizdiń 31 qala men aýdanǵa engizilgen. Astana men Almatyda bul jarna 5% kóleminde bekitildi. Al basqa aýdan men qalalarda mólsherleme ártúrli bolýy múmkin, biraq 1% kem bolmaýǵa tıis.

«Búgin biz týrısterge 5% jarna túrindegi qoldaýdyń mańyzy zor ekenin ashyq aıtýymyz kerek jáne muny Qazaqstanǵa keletin týrısterdiń durys túsinetinine senimdimin. Budan túsetin aqsha týrızmdi damytýǵa, marketıngke, destınasııany ilgeriletýge, ınfraqurylym men týrıstik qyzmetterdiń sapasyn arttyrýǵa baǵyttalady», - deıdi Qazaqstan týrıstik qaýymdastyǵynyń prezıdenti Rashıda Sháıkenova.

Onyń aıtýynsha, sheteldik týrıster bul aqsha ekologııalyq týrızmdi damytýǵa, Qazaqstannyń tabıǵaty men tabıǵı resýrstaryn saqtaýǵa jumsalatynyn biledi, týrıstik alymdy qınalmaı tóleıdi.

Ibis Novotel qonaq úıiniń basqarýshysy Arsenıı Tagaev ta osyndaı ustanymda.

«Bastamanyń ózi qısyndy ári túsinikti: týrısterden jınalatyn qarjy týrıstik salany damytýǵa, respýblıkanyń damýyna jumsalady. Bul álemdik tájirıbe. О́zderińiz biletindeı, kóptegen el týrızmdi qoldaý jáne damytý úshin bul bastamany engizip jatyr, sondyqtan osy tájirıbe óte qolaıly dep sanaımyn», - deıdi ol.