• USD 468.56

  • EUR 497.56

  • RUB 7.3

  • CNY 67.18

28 Naýryz, 20:38:56
Almaty
+35°

Tolyq emes jumys aptasymen qyzmet etetinderge ústeme jumystar úshin aqy tólenbeıdi. Bul týraly Májilistiń qaraýyna engizilgen «QR keıbir zańnamalyq aktilerine áleýmettik qorǵaý máseleleri boıynsha ózgerister men tolyqtyrýlar engizý týraly» zań jobasynda kórsetilgen, dep habarlady QazAqparat. 

Depýttar talqylaýyna berilgen qujatta QR Eńbek kodeksiniń «Jumys ýaqyty jáne onyń túrleri» babyna ózgeris engizý usynylǵan.

«Taraptardyń kelisýi boıynsha eńbek shartynda 5 kúndik nemese 6 kúndik jumys aptasymen kezektesý quqyǵymen 4 kúndik jumys aptasyn belgileýge jol beriledi. Tolyq emes jumys kúnimen (aýysymmen) nemese tolyq emes jumys aptasymen jumys isteıtin jumyskerler úshin tıisti kúntizbelik jylǵa arnalǵan jumys ýaqytynyń balansy boıynsha jumys saǵattarynyń qalypty sany tıisinshe azaıady», - dep jazylǵan qujatta.

Eńbek jáne halyqty áleýmettik qorǵaý mınıstrligi usynǵan túsindirme qujatta 4 kúndik jumys kestesimen qyzmet etetinderge ústeme jumys úshin qosymsha aqy tólenbeıtini jazylǵan.

«Tolyq emes jumys kúni (aýysym) nemese tolyq emes jumys aptasynda jumys isteıtin qyzmetkerlerge ústeme jumystarǵa aqy tólenbeıdi. Mysaly, qyzmetker bes kúndik jumys aptasynda kúnine 4 saǵat jumys isteıdi. Alaıda, bir aı ishinde óndiristik qajettilikke baılanysty qyzmetker 3 ret jumysta qalyp, 6 saǵattan jumys istedi. Aıdyń sońynda jumys berýshi bul qyzmetkerge ústeme aqy tólemeıdi. О́ıtkeni, jumys ýaqytynyń balansyna sáıkes, bes kúndik saǵat normasy 144 saǵatty quraıdy jáne jumys rejımine sáıkes ony azaıtý qarastyrylmaǵan. Osyǵan baılanysty, jumys ýaqytynyń teńgeriminde kózdelgen ýaqyt normasy qoldanylatyn jumys rejımine proporsıonaldy túrde azaıtylýy tıis ekenin zańnamalyq túrde bekitý usynylady», - dep kórsetilgen Májilistiń qaraýyna berilgen zań jobasynda.

Mınıstrlik deregenshe, tolyq emes jumys kestesimen qyzmet etý jyl saıynǵy aqyly eńbek demalysynyń uzaqtyǵyna, eńbek ótilin esepteýge áser etpeıdi.

Aıta keteıik, qoldanystaǵy QR Eńbek kodeksinde mundaı norma joq.

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir