Foto: Vıdeodan kadr
Oppozısııalyq belsendi, Demokratııalyq partııa bastamashyl tobynyń múshesi Abzal Dostııarov qańtar oqıǵasynyń bir jyldyǵy qarsańynda polısııa qyzmetkerleri 4 jasar qyzymen qosa kúshtep bólimshege áketken oqıǵa áli de quzyrly organdardyń nazarynan tys qalyp otyrǵanyn aıtady. Belsendiniń sózinshe, qyzy psıhologııalyq travma alyp, kóshege shyǵýǵa qorqyp qalǵan.
Abzal Dostııarovqa advokaty 9 qańtardaǵy jaǵdaı boıynsha 5 qańtarda túsirgen aryzy negizinde eshqandaı prosedýra bastalmaǵanyn jetkizgen.
«Bala quqyǵynyń aıaqasty bolǵany eleýsiz qalatyn bolsa, tipti ne derimdi de bilmeımin. Onda el bolýymyz qıyn-aý» deıdi belsendi.
Oqıǵa bolǵan kúnnen beri «Bala quqyqtary jónindegi ýákil Arýjan Saın qaıda, nege únsiz» deýshiler kóp. Bala quqyqtary jónindegi ýákildiń buǵan aıtar jaýaby tómendegideı:
– Biz kelip túsetin ár shaǵymdy qaraımyz. Bul jerde balanyń quqyǵyn qorǵaý jolynda nátıje beretin áreket jasaý asa mańyzdy. Ári bul – áleýmettik jelide kommentarıı jazǵannan anaǵurlym tıimdi. Biz Abzaldyń zaıyby Danamen baılanystamyz, prokýratýra men ishki ister mınıstrligine úndeý daıyndap jatyrmyz, – dedi Arýjan Saın.
Abzal Dostııarov Bala quqyqtary jónindegi ýákil keńsesindegilerden keńes alǵanyn rastap otyr. Alaıda «olarǵa ózimiz shyqtyq, bar bolǵany bir ret juma kúni (6 qańtar – red) sóılestik» deıdi.
Májilis depýtaty Qazybek Isa da «Aq jol» partııasy fraksııasynyń atynan bas prokýratýra men ishki ister mınıstrligine arnaıy hat ázirlenip jatqanyn, búgin joldanatynyn málim etti. Depýtat oppozısııalyq kózqarastaǵy belsendige aıtary baryn, biraq bala quqyǵy máselesinde saıası alańdaǵy áńgimeni ysyryp qoıý keregin qosa ketti.
– Janbolat Mamaı men Abzal Dostııarov Aqjol partııasyn áldeneshe ret negizsiz synap, bizge jala japty. Biraq zań aldynda bárimiz teńbiz. Bárimizdiń quqyǵymyz teńdeı saqtalýy mindetti. Ásirese bala quqyǵy. Zań saıasattaǵy áńgimeler men kózqaras qaıshylyǵynan joǵary turýǵa tıis. Sondyqtan Dostarııarovty kishkentaı qyzymen ustap áketken oqıǵaǵa baılanysty Azat Perýashevpen («Aq jol» partııasynyń tóraǵasy – red.) birge bas prokýratýra men ishki ister mınıstrligine hat ázirlep jatyrmyz. Búgin jiberemiz, – dedi depýtat.
Quqyqqorǵaýshy Marjan Aspandııarovanyń aıtýynsha, belsendini 4 jasar qyzymen qosa kúshtep áketý polısııa qyzmetkerleriniń tómengi moraldyq-etıkalyq kelbetinen habar beredi.
– Bizdiń polıseılerdiń kóbinde moral da, etıka da, saýat ta bilim de joq. Deni adamgershilikten jurdaı. Vıdeony kórip ekrannyń myna jaǵyndaǵy bizdiń ózimiz jaman bolyp otyrmyz. Al bala qandaı travma aldy, anasy qandaı kúıde... Ony oılaýdyń ózi aýyr. Ulttyq qaýipsizdik komıtetin ultqa qaýipti komıtetke aınaldyrǵanyn, polısııa qyzmetkerleri jemqor, qylmysker bolyp ketkenin qańtar oqıǵasy, ózge de kúndelikti jaǵdaılar talaı dáleldep berdi. Bul jaǵdaı polısııa qyzmetkerleriniń adam quqyǵyn aıaqasty etýge eti úırenip ketkenin, áreketteri úshin eshqandaı jaza bolmaıtynyn biletinderin anyq kórsetedi. Is sotqa deıin jetetinine senbeımin. Ary ketse, qoǵam talabynan soń polıseılerge tártiptik jaza qoldanatyn shyǵar. Al bundaı oqıǵa demokratııasy damyǵan elde bolsa, úlken shýǵa ulasar edi, – deıdi ol.
Marjan Aspandııarova polısııa qyzmetkerleriniń osyndaı áreketteri men oǵan laıyqty quqyqtyq baǵa bermeý azamattyq qoǵamdy úreılendirý, saıasattan alshaqtatý úshin jasalady degen pikirde.
– Bılik bir jaǵynan zańsyzdyqty osylaı kópshilikke jarııa túrde jasaý arqyly kimde-kim belsendi bolsa, oıyn ashyq aıtyp, bılikke talap qoısa, kóretini osy bolady, osylaı aıamaımyz degendi ashyq túrde kórsetip otyr. Sol úshin de buǵan durys quqyqtyq baǵa bermeıdi. Eger ózderiniń zańsyz áreketin moıyndasa, ózge de belsendiler kórgen zańsyzdyqtary týraly aıta bastaýy múmkin. Al ondaılar óte kóp. Qazaqstanda belsendilerdi qýdalaýdyń túr-túrin kórip júrmiz, – deıdi ol.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir