Elorda Táýelsizdik kúnin qalaı atap ótedi

Bul kúnderi elordanyń bilim berý uıymdarynda «Táýelsizdik el urpaqtary» onkúndigi, «Qazaqstan jasampazdyq jyldary» kitap-ıllıýstrasııalyq kórmesi, tarıhı tanymdyq jáne tárbıe saǵattary, oqýshylar arasyndaǵy jarystar, dóńgelek ústelder, ǵylymı konferensııalar, kompıýterlik grafıka boıynsha jarystar jáne basqa da is-sharalar ótkiziledi.

Elordalyq ýnıversıtetterdiń birinde JANA BELESTEGI JASTAR jergilikti jastar forýmy ótti.

Oqýshylar saraıynda Táýelsizdik kúnine jáne balalar jylyna oraı mektep oqýshylarynyń forýmy uıymdastyryldy.

Mýzykalyq jas kórermen teatrynda «Táýelsizdik jáne elorda» respýblıkalyq aqyndar baıqaýynyń jeńimpazdaryn marapattaý rásimi ótti. Oǵan 40 jasqa deıingi aqyndar qatysty. Olar Qazaqstannyń qazirgi tarıhyna jáne elimizdiń bas qalasyna arnalǵan avtorlyq óleńderin tartý etti.

Merekege oraı elordada Menedjment, bıznes jáne bilim kolledjine arnap salynǵan 110 oryndyq stýdenttik jataqhana saltanatty túrde ashyldy.

Sondaı-aq Astana Polytechnic Joǵary kolledjinde elektronıka jáne telekommýnıkasııadan ınnovasııalyq zerthana ashylady.

Osy kúni Kúltegin kóshesinde 290 oryndyq №98 «Mıras» balabaqshasy ashylady.

I Respýblıkalyq «Jas óren» baıqaýyn Erkeǵalı Rahmadıev atyndaǵy memlekettik akademııalyq fılarmonııa ótkizedi.

Sondaı-aq Táýelsizdik kúnine oraı 14 jeltoqsan kúni saǵat 19:00-de Beıbitshilik jáne kelisim saraıynda qala turǵyndary úshin «Táýelsizdik – el urany» gala-konserti uıymdastyrylady.

Sol kúni aýdandyq Belsendi uzaq ómir súrý ortalyqtary merekelik konsertter men mádenı-tanymdyq is-sharalar ótkizedi. Al L.N. Gýmılev atyndaǵy EUÝ qabyrǵasynda «Jeltoqsan qaharmandary» konferensııasy ótedi.

15 jeltoqsan kúni saǵat 19:00-de Qazaqstan jeńil atletıka kesheninde mereke qurmetine BATYRS' BATTLE ótedi. Is-shara qala ákimdiginiń qoldaýymen uıymdastyryldy. Kirý tegin.

15 jeltoqsanda Astanada jastardyń qatysýymen patrıottyq avtojarys, QR Táýelsizdik kúnine arnalǵan «Qazaqstan Uly dala Eli» merekelik konserttik baǵdarlamasy, sol sııaqty jekpe-jekten týrnır ótedi.

15 jáne 16 jeltoqsanda NOMAD City Hall sahnasynda Q.Júnisovtiń «Alash» dramasyn tamashalaýǵa bolady. Bastalýy saǵat 19.00-de.

15-17 jeltoqsan aralyǵynda mereke qurmetine sadaq atýdan Astana Ashyq Kýbogy ótedi.

Bıyl «Alǵashqy qar» shańǵy maýsymynyń ashylýy da ataýly kúnge oraılastyrylǵan, is-shara 16 jeltoqsanda shańǵy trassasynda ótedi. Bastalýy saǵat 11.00-de.

16-18 jeltoqsan aralyǵynda Táýelsizdik saraıynda barlyq sanattar men jastaǵy juptyq bılerden elordanyń ashyq chempıonaty uıymdastyrylady.

Sondaı-aq 16-19 jeltoqsan aralyǵynda elordada Ulttyq bı sporttyq oıyndary ótedi. Ashylý saltanaty Beıbitshilik jáne kelisim saraıynda 17 jeltoqsan kúni saǵat 12:00-de ótedi.

Mereke qurmetine qalada qaıyrymdylyq is-sharalar, ómirlik qıyn jaǵdaıǵa tap bolǵan balalardy, áleýmettik az qamtylǵan otbasylardy qoldaý aksııalary ótkiziletin bolady. 1986 jylǵy jeltoqsan oqıǵasynyń qatysýshylaryna sanatorıı-kýrorttyq em bere otyryp, birjolǵy áleýmettik kómek tóleý kózdelgen.