Astanada aýyz sý jáne gaz jylý stansııasy salynyp jatyr

Astana ákimi Jeńis Qasymbek gaz jylý stansııalary, aýyz sý stansııalary men JEO-3 qurylysynyń barysymen tanysty. Ákim júrgizilip jatqan jumystar týraly Instagram paraqshasynda aıtyp berdi.

"Qalada jaıly ómir súrý - tirshilikti qamtamasyz etý júıeleriniń jumysyna baılanysty. Qala turǵyndarynyń sany jyl saıyn ósip kele jatqanyn eskere otyryp, jumys istep turǵan tirshilikti qamtamasyz etý nysandarynyń qabilettiligine kóńil bólip qana qoımaı, jańalaryn da salý qajet.

Qalany aralaý barysynda osyǵan deıin qurylysy bastalǵan nysandardyń jumysymen tanystym. Olar - gaz jylý stansııalary, aýyz sý stansııasy (SSS-3), JEO-3.

Eki gaz jylý stansııasyn («Turan», «Ońtústik-Shyǵys») kelesi jylytý maýsymynan (2023 jyly) bastap iske qosý josparlanyp otyr. Olar jylýmen jabdyqtaý kólemin edáýir arttyrýǵa, qurylysy qarqyndy túrde júrip jatqan bolashaq aýdandardy jylýmen qamtýǵa múmkindik beredi. Jańa gaz jylý stansııalarynyń qýaty JEO-3 qýatynan asyp túsedi. Máselen «Turan» gaz jylý stansııasy 8 mln sharshy metr turǵyn úıdi jylyta alady.

JEO-3-ke toqtalar bolsaq, qalaǵa qajetti nysannyń uzaq qurylymdy ekeni belgili. 2023 jyly JEO-3 jumysyn iske qosý mindeti qoıyldy. Qýaty - 3,5-4 mln sharshy metr turǵyn úı.

Sol sııaqty qalany qosymsha aýyz sýmen qamtamasyz etý qajet. Aýyz sý stansııasynyń da (SSS-3) tolyq iske qosylýy kelesi jylǵa josparlanyp otyr. SSS-3 qýaty - táýligine 100 tekshe metr sýdan asady.

Qalanyń qazirgi damý qarqynyna sáıkes jańa tirshilikti qamtamasyz etý nysandarynyń da qýaty jetkiliksiz bolady. Sol sebepti Astananyń 2035 jylǵa deıingi Damý bas josparynyń jobasyna qosymsha aýyz sý stansııalarynyń, jylý stansııalarynyń jáne t.b. qurylysy engizilýde",-dep jazdy elorda ákimi.