Dımash Qudaıbergen Ekibastuzdaǵy jaǵdaıǵa kinálilerdi jylýy joq túrmege qamaýǵa shaqyrdy

Belgili ártis, esimi alys-jaqyn shetelge tanymal oryndaýshy Dımash Qudaıbergen 150 myńnan astam turǵyny bar Ekibastuz qalasynyń jylýsyz qalýyna kináli adamdardy jaýapqa tartyp, túrmege jabýǵa shaqyrdy. Bul týraly ol áleýmettik jelidegi paraqshasynda jazdy.

"Ekibastuzdaǵy halyqtyń jaǵdaıy úshin alańdap otyrǵanymdy aıtpasam da túsinikti bolar. Meniń paraqshamdy kóptegen basqa memlekettiń adamdary oqıtyn bolǵasyn, ishki máselemizdi syrtqa shyǵarǵym kelmep edi, biraq myna dalada qalǵan analarymyzdyń kóz jasy zaıa ketpesin deseńizder,JEO basshysynan bastap, kinálilerdiń barlyǵy jaýapqa tartylyp, jylýy joq túrmede jazasyn óteıdi dep senemin…" delingen ártistiń jazbasynda.

27 qarashada Pavlodar oblysy Ekibastuz qalasyndaǵy jylý elektr ortalyǵynda apat bolyp, 30 gradýstyq aıazda qaladaǵy kópqabatty úıler jylýsyz qalǵan. 28 qarashada qala boıynsha tótenshe jaǵdaı jarııalandy. Jylý elektr ortalyǵy olıgarh Aleksandr Klebanovqa tıesili. Qalanyń burynǵy ákimi Nurjan Áshimbetov olıgarh shyǵynǵa batqan jylý ortalyǵyn sýbsıdııaǵa senip jekeshelendirip alǵanyn aıtady. Apattan keıin prezıdent problemalyq energoresýrstardy memleket menshigine qaıtarý máselesin qarastyrýdy tapsyrǵan. Apatqa baılanysty qylmystyq is qozǵalyp, tergeý bastalǵan. Ekibastuzda júrgen vıse-premer Roman Sklıar olıgarhtyń jaýapkershiligine baılanysty áńgime tıisti tekseris aıaqtalǵan soń qozǵalatynyn aıtqan. Búgin qaladaǵy 71 kópqabatty problemalyq úıdiń jertólelerindegi jylytý toraptaryna jylý berilgeni habarlandy.