Halyq Prezıdenttiń reformalary tolyq oryndalatynyna senimdi bolýy kerek – Erlan Qoshanov

Búgin Qasym-Jomart Toqaevtyń Respýblıkalyq qoǵamdyq shtabynyń qorytyndy otyrysy ótti. Jıyn barysynda úgit-nasıhat kezeńinde atqarylǵan jumystar talqylandy.

Shtab basshysy Erlan Qoshanov prezıdenttik saılaý zańǵa jáne halyqaralyq normalarǵa tolyq sáıkes ótkenin jetkizdi.

Ol Qasym-Jomart Toqaevtyń saılaýdaǵy aıqyn jeńisi – qoǵamnyń Prezıdentke jáne onyń reformalar baǵytyna degen zor seniminiń kórsetkishi ekenin basa aıtty. Saılaý Halyqtyq koalısııaǵa kirgen barlyq partııa men qoǵamdyq uıymdardy bir komandaǵa biriktirdi. Olar barlyq aımaqty aralap, aýqymdy úgit-nasıhat jumystaryn júrgizdi.

«Jalpy, bul saılaý qoǵam men bıliktiń eldiń erteńgi damýyna qatysty túsinigi ortaq ekenin kórsetti. Halyq Prezıdenttiń reformalary belgilengen merzimde jáne tolyq oryndalatynyna senimdi bolýy kerek. Bul – Halyqtyq koalısııanyń basty mindeti», - dedi Shtab basshysy.

Erlan Qoshanov Halyqtyq koalısııanyń, Respýblıkalyq jáne aımaqtyq qoǵamdyq shtabtardyń múshelerine, senimdi ókilderge, jastar belsendileri men baqylaýshylarǵa atqarylǵan jumystar úshin alǵysyn bildirdi.

Úgit-nasıhat naýqany kezinde Qasym-Jomart Toqaevtyń jaqtastary 42 qala men 5000-nan astam aýyldy aralady. Olar ótkizgen 24 myń úgit-nasıhat is-sharasyna 3 mıllıon saılaýshy qatysty. Kezdesýler barysynda azamattardan 40 myńnan astam usynys pen tilek jınaldy.

«Halyqtyq koalısııanyń jumysy munymen aıaqtalmaıdy. Biz bárimiz Memleket basshysy jaqtastarynyń komandasynda qalamyz. Koalısııaǵa kirgen barlyq qoǵamdyq-saıası kúsh Qasym-Jomart Toqaevtyń Saılaýaldy baǵdarlamasyn jáne barlyq saıası reformany júzege asyrýǵa belsendi atsalysady dep oılaımyn», - dedi Erlan Qoshanov.

Jıyn barysynda tuńǵysh ǵaryshker, «Halyq qaharmany» Toqtar Áýbákirov, «Aq jol» Qazaqstan demokratııalyq partııasynyń tóraǵasy Azat Perýashev, Qazaqstan Halyq partııasynyń basshysy Ermuhamet Ertisbaev, qoǵam qaıratkeri Jaqsybek Qulekeev, Qazaqstannyń Azamattyq Alıansynyń prezıdenti Baný Nurǵazıeva, Qazaqstan Jazýshylar odaǵynyń tóraǵasy Ulyqbek Esdáýlet, belgili zańger Baqytjan Bazarbek, Pavlodar oblystyq qoǵamdyq shtabynyń basshysy Ilıa Terenchenko jáne «Qazaqstan Team» jastar birlestiginiń basshysy Oljas Súleımenov jáne koalısııanyń basqa da músheleri sóz sóıledi.