"Másimov Vengrııa azamattyǵyn alǵan": SIM aqparatty joqqa shyǵardy

Syrtqy ister mınıstriniń orynbasary Roman Vasılenko "Kárim Másimov Vengrııa azamattyǵyn alǵan" degen aqparatty joqqa shyǵardy. 

"Vengrııa tarapynyń bizge bergen málimetinshe, Másimov myrzanyń mundaı azamattyǵy bolmaǵan. Qosymsha aqparat túsken joq. Bizdiń elde qos azamattyqqa tyıym salynǵan jáne basqa eldiń azamattyǵyn alǵan adam avtomatty túrde bizdiń azamattyqtan aıyrylady" dep jaýap berdi Roman Vasılenko májilis kýlýarynda.

Buǵan deıin UQK-nyń burynǵy tóraǵasy Kárim Másimovte Vengrııa memleketiniń azamattyǵy bary týraly aqparat taraǵan. 18 qarashada Másimovtyń soty bastaldy. Oǵan birneshe aıyp taǵylǵan, solardyń ishindegi eń aýyry memleketke opasyzdyq jasady degen aıyp. Sot prosessi Astana qalasynyń qylmystyq ister jónindegi mamandandyrylǵan aýdanaralyq sotynda ótip jatyr. Is "qupııa" sanatyna jatatyndyqtan, málimetter jarııalanbaı otyr.