"Men úshin kútpegen jańalyq boldy": Janbolat Mamaı tergeý ızolıatorynan úıqamaqqa aýystyryldy

Qoǵam belsendisi, tirkelmegen Demokratııalyq partııa jetekshisi Janbolat Mamaı úıqamaqqa shyǵaryldy. Sot onyń bultartpaý týraly sharasyn ózgertip, tergeý ızolıatorynan úıqamaqqa jibergen. Búgin keshke ony ızolıator aldynan jaqyndary, jaqtastary qarsy aldy. 

Oppozısııalyq saıasatkerdiń ústinen  qozǵalǵan qylmystyq is boıynsha alǵashqy sot 7 qarashada №2 Bostandyq aýdandyq sotynda ótetini de belgili boldy.

"Sizderge kóp raqmet! Bul men úshin kútpegen jańalyq boldy. SIZO-dan shyǵyp, úıge barýǵa esh daıyndalmaǵan edim. 8 jarym aıymdy kamerada ótkizdim. Aıaq astynan bostandyqqa shyǵasyn dep qaǵaz alyp keldi. Sizderge alǵysym sheksiz! Bul – tek qoǵamnyń jeńisi dep oılaımyn. Bul – tolyq bostandyq emes. Úıqamaqqa aýystyryldym. Eger qoǵam narazylyq bildirip, halyqaralyq uıymdar qoldaý bildirmese, búgingi jaǵdaı oryn almas edi. Maǵan taǵylǵan aıypty men moıyndaǵan emespin jáne moıyndamaımyn da. 8 jarym aıdan beri men saıası sebeppen túrmege qamaldym. Densaýlyǵym óte jaqsy. Oǵan qatysty eshqandaı aryz-shaǵymym joq. Búginge deıingi álemge degen meniń terezem jubaıym men qorǵaýshylarym boldy. Sotta shyndyqty dáleldep kúresýge men daıynmyn", dedi Janbolat Mamaı. 

Janbolat Mamaıǵa zańsyz mıtıng uıymdastyrdy, polısııaǵa til tıgizdi, jalǵan aqparat taratty degen aıyptar taǵylǵan. Jýyrda Janbolat Mamaıǵa taǵylǵan "jappaı tártipsizdik uıymdastyrdy" degen aıyp "Beıbit jıyn ótkizý tártibin buzý" babymen aýystyrylǵan. Belsendiniń jubaıy, jýrnalıst Inga Imanbaı bılik mundaı qadamǵa halyqaralyq qysymnan keıin bardy dep sanaıdy.