• USD 468.56

  • EUR 497.56

  • RUB 7.3

  • CNY 67.18

28 Naýryz, 17:05:29
Almaty
+35°

"Birligimiz – áralýandyqta" taqyrybynda ǵylymı-praktıkalyq forýmy

18 qazanda Almaty qalasynda Rýhanı kelisim kúnine oraılastyrylǵan "Birligimiz – áralýandyqta" taqyrybynda ǵylymı-praktıkalyq forým ótti. Sharaǵa qalanyń dinı birlestikteriniń basshylary, sheteldik sarapshylar qatysyp, eldegi rýhanı yntymaqtastyqty damytý jáne ekstremızmmen kúres syndy máselelerdi talqylady.

Forým Ál-Farabı atyndaǵy QazUÝ Ǵylymı kitaphanasy alańynda ótti. Spıkerler qatarynda Almaty qalasynyń bas ımamy Tólebı Dádiluly, pravoslav shirkeýiniń epıskopy Gennadıı, Rım-katolık shirkeýi Qasıetti úshtiktiń kýrııasy Laoz Karlos Zamarro, Aqparat komıtetiniń tóraǵasy Erjan Núkejanov bar.   

Ǵylymı-praktıkalyq forýmdy ashqan Almaty qalasy Din isteri jónindegi basqarmasynyń basshysy Nurlan Qıqymov óz sózinde forýmnyń mańyzy men negizgi maqsattaryn atap ótti. 

 

"Búgingi kún eldegi Rýhanı kelisimge arnalady. Sońǵy jyldaǵy oqıǵalar dinı jáne mádenı dıalogtyń mańyzdy ekenin, memleketaralyq jáne dinaralyq qatynastyń kúrdeli ekenin taǵy dáleldedi. Táýelsizdik jyldarynda biz Qazaqstanda túrli dinderdiń arasynda beıbit kelisimdi ornata alǵanymyzben maqtanamyz. Qazaqstanda túrli konfessııalar men dinı uıymdardyń jumys isteýine arnalǵan barlyq jaǵdaı jasalǵan. Onyń ústine elimiz halyqaralyq arenada bitimgerlik baǵytty da damytýda. Onyń mysaly retinde jaqynda Astanada ótken dástúrli din ókilderiniń VII sezin aıtýǵa bolady", – dedi ol. 

 

Rýhanı kelisim kúnine baılanysty ótken jıynda spıkerler pikir almasyp, tatýlyq pen birlikti, túrli dinder arasynda yntymaqty nyǵaıtýǵa baılanysty óz usynystaryn ortaǵa saldy. Máselen, Almatynyń bas ımamy Tólebı Dádiluly otbasydaǵy din máselesin kóterip, balalarǵa "áralýandyq" pen "zaıyrlylyq" uǵymdaryn durys túsindirý keregin atap ótti. 

 

"Áralýandylyq elde ómir súrip jatqan ózge din ókilderiniń dástúrine, nanym-senimine qurmetpen qaraý degen sóz. Muny aıtqan sebebim otbasy ishindegi keı kıkiljińderge dinı senim aralasyp ketip jatyr. Ákesi basqa, al balasy basqa dinde bolýy múmkin. Al búgingi Rýhanı kelisim kúniniń basty maqsaty – tynyshtyq pen beıbitshilik úshin qyzmet etý. Tynyshtyq otbasydan bastalady. Sondyqtan din basshylary men uıym tóraǵalary ýaǵyz kezinde osy máseleni qaperge alsa eken deımin", – dedi ol. 

 

Rım-katolık shirkeýi Qasıetti úshtiktiń kýrııasy Laoz Karlos Zamarro Qazaqstanda kez kelgen din ókili qaýipsizdikte jáne turaqtylyqta ómir súre alatynyn, elde buǵan arnalǵan alǵysharttar bar ekenin málimdedi. Onyń sózinshe, búginde Qazaqstan "kezdesý memleketi" degen mártebege ıe. Sebebi munda janjaldasqan elder men adamdar kelip, qoryqpaı kezdesý ótkize alady. 

Ǵylymı-forýmǵa qatysty pikir bildirgen orys pravoslav shirkeýiniń epıskopy Gennadıı Rýhanı kelisim kúni aıasynda ótetin basqosýdyń dástúrli sharaǵa aınalýy qýantarlyq jaıt ekenin aıtady. 

"Meniń bilýimshe, mundaı jıyn elimizdiń barlyq aımaǵynda ótedi. Qazaqstan qazirgi tańda aıryqsha mıkroálem bolyp otyr. Munda túrli din ókilderi bar. Bilesizder, HH ǵasyrda bilimdi, bilikti jáne aýqatty azamattardyń kópshiligin Qazaqstanǵa jer aýdarǵan. Degenmen qazaq halqynyń qonaqjaılyǵy arqasynda olar aman qaldy. Qazir osy azamattar eldegi túrli konfessııalyq uıymdardyń negizin saldy. Sóz sóılegenderdiń barlyǵy rýhanı kelisim joly eldiń strategııalyq damýynda qajetti ekenin atap ótti. Qazir bilim berý salasynda, medısınalyq qyzmet kórsetkende dinı erekshelikterine eshkim nazar aýdarmaıdy. Memlekettiń osyndaı zaıyrly saıası baǵytty tańdaǵany qýantady. Munda barlyǵymyz bir-birimizdi baýyr sezinemiz", – dep málimdedi ol. 

Forýmdy uıymdastyrǵan Almaty qalasy Din isteri jónindegi basqarmasy basshysynyń orynbasary Erǵalı Kósheke jıynnyń maqsaty túrli din ókilderin bir ortaǵa jınaý jáne din salasyndaǵy ózekti máselelerdi talqylaý ekenin atap ótti. 

 

"Qazaqstan boıynsha 18 konfessııa tirkelse, sonyń 17-i Almatyda bar. Bul Almatynyń elimizdiń rýhanı astanasy ekenin kórsetedi. Forýmǵa sheteldik jáne qazaqstandyq dinı sarapshylar qatysýda. Qazir álemde qaqtyǵystar bolyp jatqanyn kórip otyrmyz. Biz din ókilderi arqyly osyndaı elderdi soǵyssyz álem qurýǵa shaqyrǵymyz keledi", – dedi Erǵalı Ahılbekuly. 

 

Aıta keteıik, Rýhanı kelisim kúni - qaqtyǵystar men janjaldarǵa toqtam salý kúni, tatýlyq izdeý, jaqynǵa qaıyrymdylyq jáne kómek kúni. Ataýly data Qazaqstan egemendik alǵan soń belgilegen alǵashqy merekeleriniń biri boldy.

"Qamshy" silteıdi
Ilmek sózder: Rýhanı kelisim kúni

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir