Parlament kelip túsken zańdardyń 96 paıyzyn biraýyzdan qabyldaǵan

Qazaqstan depýtattary zańdardy 96%-100% paıyz maquldaýmen qabyldaıdy, dep jazady Energyprom.kz saıty.

Portal málimetinshe, bir jarym jyl jumys istegen jetinshi shaqyrylym úkimet pen prezıdent jibergen birde-bir zańnamalyq ıdeıany joqqa shyǵarmaǵan. О́zderi de enjar túrde zańǵa bastamashylyq jasaıdy. Depýtattar zań jobalarynyń 23%-yn ǵana ózderi kótergen.

"Basqarýdyń dıktatorlyq stıli men memlekettik dýmada prezıdenttik "Edınaıa Rossııa" partııasy basym bolǵan Reseıdiń ózi bulaı "biraýyzdan" qoldamaıdy" dep jazady basylym.

Energyprom.kz prezıdent sońǵy jyldary kóppartııalyq júıeniń qajettiligi men parlamentte oppozısııanyń bolýy týraly birneshe ret aıtqanyna qaramastan, shyndyǵynda, Qazaqstan parlamentinde oppozısııa joq nemese onyń daýysy daýys berý nátıjesine eshqandaı áser etpeıdi dep jazady.

Qazaqstanda zań shyǵarý bastamasy prezıdentke, úkimetke jáne parlament depýtattaryna tıesili. Jetinshi shaqyrylymnyń jumysy bastalǵaly barlyǵy 147 zań jobasy qozǵalǵan. Zań jobalarynyń negizgi bóligi (76%) úkimetten túsken.

"Zań jobalarynyń maquldaný deńgeıine qaraıtyn bolsaq, olardyń kópshiligine qatysty qazaqstandyq depýtattardyń nyq ustanymy joq sııaqty nemese olardyń berik ustanymy áriptesterimen, úkimetpen nemese prezıdentpen kelisip jatqan sııaqty. 96% maquldaý parlamenttiń daýys berý nátıjesine áser etý múmkindiginiń óte tómen ekenin kórsetedi. Tarıhqa kóz júgirtsek, Qazaqstanda depýtattar men úkimet arasynda teketires joq, BAQ kóbine birinshisin "moıynsunǵysh" dep ataıdy" delingen portal aqparatynda.