Ýkraınanyń ekinshi prezıdenti: Ýkraına jeńilse, Pýtın postkeńestik elderge qaraı jyljıdy

Ýkraınanyń ekinshi prezıdenti Leonıd Kýchma VVS-ge bergen suhbatynda Reseıdiń Ýkraınaǵa basqynshylyǵynyń qalaı aıaqtalatyny kóp nárseni sheshetinin aıtty.

Ol qazirgi ýaqytta úshinshi dúnıejúzilik soǵys bastalýdyń az-aq aldynda turǵan bolýy múmkin dep sanaıdy. Onyń pikirinshe, eger Ýkraına Reseıge toıtarys berse, onda Pýtın osymen toqtaıdy. Eger Ýkraına jeńiletin bolsa, onda Kreml áskerı agressııa arqyly geografııasyn keńeıtýdi jalǵastyrady.

Leonıd Kýchma ekinshi ssenarıı júzege asa qalsa, Reseıden qaýip birinshi kezekte Lıtva men Polshaǵa emes, NATO-ǵa kirmeıtin postkeńestik elderge tónedi degen oıda.

"Máskeýdiń Moldovaǵa, Soltústik Qazaqstanǵa, Grýzııaǵa doq kórsetýi ádettegi jaǵdaıǵa aınalyp barady. Reseı ózinen álsizderge ǵana tisin batyrady. Al NATO-ǵa soǵys ashpaıdy. Ásirese búgingideı áskeri álsiregen shaqta. Jaı soǵysta NATO Reseı armııasyn tas-talqan etedi, ıadrolyq soǵysta joq qylady. Pýtın ne utylyp tynatyn, ne ólip tynatyn soǵysty asha ma? Esi durys adamnyń jaýaby aıtpasa da belgili. Biraq ol..." degen  Leonıd Kýchma sóziniń aıaǵyn jalǵastyrmady.

Sondaı-aq ol Reseı strategııalyq ıadrolyq qarýdy tek ózine qater tóngen jaǵdaıda, ári tek AQSh-qa qarsy qoldanýy múmkin ekenin, alaıda Ýkraınaǵa qarsy urysta Pýtınniń saıası pozısııalaryna qaýip tónetindeı jaǵdaı týsa, taktıkalyq ıadrolyq qarýdy qoldanýdan taıynbaıtynyn jetkizdi.

"Onda Ýkraınanyń jaǵdaıy kúrdelene túsedi. Bundaı jaǵdaıda Pýtındi batys elderi ǵana toqtata alady" deıdi ol.

Buǵan deıin Reseıdiń eks-prezıdenti, qazir Qaýipsizdik keńesi tóraǵasynyń ıaǵnı Pýtınniń orynbasary bolyp otyrǵan Dmıtrıı Medvedevtiń "VKontakte" jelisindegi resmı akkaýntynda "Kıevten keıin Qazaqstandy basyp alamyz" degenge emeýrin tanytqan jazba jarııalanyp, uzamaı óshirilgen. Onyń kómekshisi Medvedev mundaı jazba jarııalamaǵanyn, onyń paraqshasyn hakerlep buzǵanyn habarlaǵan. Alaıda qazaqstandyqtar buǵan senbeıtinin, óshirilgen jazba búgingi Reseı bıliginiń pıǵylyn dál kórsetetinin aıtady.