Tergeý ızolıatorynda azaptalǵan Saıat Ádilbekulyn qylmystyq qýdalaý toqtatyldy

Qańtar oqıǵalary kezinde jaralanyp, artynan jappaı tártipsizdikke qatysty dep aıyptalǵan Saıat Ádilbekulynyń ústinen qozǵalǵan qylmystyq is toqtatyldy. Bul týraly Saıat Ádilbekuly jelidegi paraqshasynda málim etti.

"Qańtardaǵy kúnderden beri meni qorǵaǵan, qoldap, kómektesken adamdarǵa, alǵys aıtamyn. О́zimde bardyń bári úshin, meni dál sizderge jibergeni úshin qudaıǵa shúkirshilik etemin. Sizderdiń kómekterińizben men qylmystyq qýdalaýdy toqtatýǵa qol jetkizip, adal atymdy aqtaı aldym" degen Saıat Ádilbekuly quqyqqorǵaýshylar men birqatar jýrnalısterge, medıalarǵa jeke alǵysyn bildirdi.

Prokýratýra qaýlysynda Almaty qalasy aýmaǵyndaǵy jappaı tártipsizdikterge qatysý faktisi boıynsha qylmystyq kodekstiń 35-baby 1-bóligi 2-tarmaǵy negizinde qozǵalǵan iste onyń áreketterinde qylmystyq quqyq buzýshylyq quramy dáleldenbegeni, sondyqtan Saıat Ádilbekulyna qatysty qylmystyq qýdalaý qylmystyq is sheńberinde toqtatylatyny aıtylady.

Saıat Ádilbekov 5 qańtarda úıinen syrqattanyp jatqan qyzyna dári alýǵa shyqqan. Jaqyn jerdegi dárihanalardan qajetti dárini tappaı, ortalyqqa barady. Sol jaqta eki jerinen oq tıip jaralanyp, qalalyq 7 aýrýhanaǵa jetkiziledi. Oǵan ota jasalyp, eki kúnin jansaqtaý bóliminde ótkizgen. Al 8 qańtarda ony jáne aýrýhanada jatqan 30-ǵa jýyq jigitti polısııa alyp ketken. Saıat polıseıler aýrýhanada tutqyndaý kezinde, artynsha tergeý ızolıatorynda azaptaǵanyn aıtqan. Ol 25 qańtar kúni 11 adammen birge bultartpaý sharasy ózgertilip tergeý ızolıatorynan bosatylǵan. Artynsha, Ádilbekulyn azaptaý faktisi boıynsha qylmystyq is qozǵalǵan.