"Toqaev aldaǵy saılaýǵa qam jasap otyr": Qoǵam belsendileri saılaý týraly zań jobasyna narazylyq bildirdi

Búgin bir top qoǵam belsendileri saılaý týraly zańǵa engizý kózdelip otyrǵan ózgerister jobasyna narazylyq bildirip baspasóz konferensııasyn ótkizdi. Saılaýdy Ortalyq saılaý komıssııasynyń  akkredıtasııasynan ótken, sońǵy bir jylda shetelden qarjy almaǵan uıymdarǵa ǵana baqylaýǵa múmkindik beretin jobany qoǵamdyq talqylaý búgin aıaqtalady. Qoǵam belsendileri prezıdent Qasym-Jomart Toqaevty zań jobasyna qol qoımaýǵa shaqyrdy. 

– Nazarbaev pen onyń joldastary 30 jyl boıy halyqtyń daýysyn urlady. Bir ret te ádil saılaý bolǵan joq. Sońǵy ret qashan ádil saılaý ótip edi? Toqaev prezıdent atanǵanyna 3 jyl boldy. Alaıda búginge deıin demokratııalyq betburys bolǵan joq. Endigi zań qabyldanatyn bolsa, jaǵdaı tipten nasharlaıdy. Myna qańtar oqıǵasynan keıin bılik durystap oılanýy kerek. Áıtpese taǵy da qańtar oqıǵasy qaıtalansa bıliktiń túgi qalmaıdy. Bılik usynystarymyzdy eskermeıtin bolsa, halyqqa úndeý jasaıtyn bolamyz. Daýysty urlap, halyqty aldaýdy toqtatý kerek, – deıdi jıynǵa qatysqan saıasatker Baltash Tursymbaev. 

"Táýelsiz baqylaýshylar" birlestiginiń jetekshisi Araılym Nazar táýelsiz baqylaýshylardy akkredıtasııadan ótkizbeıtin bolsa, saılaý ádil ótpeıtinin aıtady. 

– Akkredıtasııa alý qanshalyqty qajet? Baqylaýshylardy akkredıtasııadan ótkizý degenimiz saılaý ádil ótpeıtinin bildiredi. Ádilet mınıstrliginiń zań jobasynda birneshe ádiletsizdikter bar. Mysaly, osy zań jobasy arqyly táýelsiz baqylaýshylarǵa saılaý kezinde túsirgen foto, vıdeony jarııalaýǵa kedergi jasamaqshy. Budan bólek, baqylaýshylar jalaqysy, bank shottaryna qatysty aqparat berýi kerek eken. Alaıda OSK bıýdjetten saılaýǵa bólingen aqshany qalaı jumsaǵanyn memlekettik satyp alý portalynan kóre almaımyz. Bul – ádiletsizdik. Zań bárine ortaq bolýy tıis, – dedi Araılym Nazar. 

Al saıasatker Rysbek Sársenbaıuly zań jobasyn bıliktiń yńǵaıyna qaraı jasalǵan dep synady. Onyń aıtýynsha, bul – Toqaevtyń aldaǵy saılaýǵa jasaǵan daıyndyǵy. 

– Bul zań jobasy múldem talqylanbaýy kerek. Talqylaýdan alynyp tastalýy tıis. Eger bul zań jobasy qabyldansa, Toqaevtyń ekijúzdilik tanytyp otyrǵanyn bildiredi. Ol osy máseleniń mán-jaıyn túsindirip, bul zań jobasyn qabyldaý demokratııaǵa qarsy keletinin ashyq túrde aıtýy kerek. Áıtpese, Toqaev aldaǵy saılaýǵa qam jasap otyrǵany. Ádil saılaý ótkizetin bolsa, súrinetinin bilgendikten osyndaı áreketke barýda, – deıdi Rysbek Sársenbaıuly. 

Azamattyq belsendi, zańger Álnur Ilıashev bılikti dıalog ornatýǵa shaqyrsa, Ermurat Bapı zań jobasy parlamentke jiberilse, qarsylyq aksııasyn ótkizý keregin aıtty.