Ýkraına UQQK basshysy: Soǵystyń aıaqtalýyna áli uzaq ýaqyt bar

Ýkraına Ulttyq qaýipsizdik jáne qorǵanys keńesiniń basshysy Alekseı Danılov Ýkraına men Reseıdiń soǵysy áli uzaq ýaqyt jalǵasatynyn málimdedi. Bul týraly ol kanadalyq Globe and Mail basylymyna bergen suhbatta aıtqan. 

"Jaǵdaı qazir shıelenisip, qıyndap ketti. Men reseılik áskerdi álsiz dep oılamaımyn. Olar tehnıkalyq jaǵynan myqty ekenin moıyndaý kerek. Olar qarý-jaraǵyn saılap kelgen", dedi ol. 

Danılov orys armııasynyń artıllerııa men aýyr tehnıkadaǵy artyqshylyǵyn da moıyndaıtynyn aıtty. 

"Biraq bul – bizdiń áskerdi qorqytpaıdy. Biz óz mindetimizdi atqaramyz. Ara-tura qarsy shabýyldar jasaımyz. Biraq soǵys áli jalǵasyp jatyr jáne aıaqtalýyna áli uzaq ýaqyt bar. Tipti jyldarǵa sozylýy múmkin", dedi Danılov. 

Danılov Ýkraına Reseı basqynshylyǵynan beri qansha áskerin joǵaltty degen suraqqa jaýap berýden bas tartty. Degenmen ol "qarsy taraptyń shyǵynynan áldeqaıda az" dep málimdedi. 

Ol sondaı-aq Reseı áskeri Ýkraına aýmaǵynan, onyń ishinde Donbass pen Qyrymnan shyqqanda ǵana soǵys aıaqtalatynyn atap ótti. 

"Soǵysty toqtatý múmkin be? Múmkin. Alaıda sońǵy sheshimdi qoǵam qabyldaýy kerek. Eger bul qabyldanbasa, qoǵam úkimetsiz soǵysqa barady" dedi UQQK basshysy.