Ýkraına taǵy bir Reseı kemesine jasaǵan shabýyly sátti bolǵanyn málim etti (vıdeo)

"Borttaǵy TOR zenıttik-zymyran kesheniniń ózi Ýkraınanyń áskerı-teńiz kúshterine reseılik basqynshylardy qarýsyzdandyrýǵa kedergi keltire almady" dep habarlady ýkraın Áskerı-teńiz kúshteriniń basshylyǵy.

Odessa oblysy áskerı ákimshiliginiń basshysy Maksım Marchenko da "Vasılıı Beh" kemesine jasalǵan shabýyl sátti bolǵanyn málimdedi. Onyń sózinshe, ýkraın áskerıleri kemege qarsy amerıkalyq Harpoon zymyranyn qoldanǵan. Mamyr aıynyń sońynda Ýkraına Kıev Danııa, Ulybrıtanııa jáne Nıderlandydan Harpoon zymyrandaryn alǵanyn kórsetken.

Jelide reseılik býksırdi atyp túsirgen sát delingen vıdeo jarııalandy.

Zoomed in video pic.twitter.com/XorD8jI1Ry

— OSINTtechnical (@Osinttechnical) June 17, 2022

"Ýkraına teńiz palatasy" táýelsiz uıymy keme áli de sý betinde ekenin, ony qutqaryp qalýǵa tyrysyp jatqanyn habarlady.

Astrahan zaýytynda qurastyrylǵan býksırge 1605 tonna júk tıeýge bolady. Keme Reseıdiń Qara teńiz flotynda 2017 jyldan beri bar. Keme 2021 jyly "Qutqarýshy Vasılıı Beh" esimin alǵan.

Brıtan Qorǵanys mınıstrligi keme baǵyt alǵan Zmeınyı araly strategııalyq mańyzy bar nysandardyń biri ekenin aıtady. Aýmaǵy 20,5 ga bolatyn shaǵyn aral Odessa qalasy jaǵalaýynan 140 shaqyrym jerde ornalasqan. Eger Reseı aralǵa qarýyn jetkize alsa, onda Qara teńizdiń soltústik-batys jaǵynda basymdyqqa ıe bolýshy edi.

Buǵan deıin Ýkraına kúshteri Reseıdiń iri kraıseri "Máskeýdi" atyp sý túbine jibergen. Reseı kemeniń batyp ketkenin rastap, alaıda onyń apatyna kemede shyqqan órtten oq-dáriniń jarylýy sebep boldy degen málimdeme jasaǵan.