"Ál-Qaıda" uıymy Úndistanda terakt jasaıtynyn málimdedi

"Ál-Qaıda" uıymy (Qazaqstanda tyıym salynǵan uıym - Red) Úndistanda terakt jasaımyz dep qorqytyp otyr. Lańkestik top bılik partııasynyń burynǵy ókili Muhammed paıǵambar týraly aıtqan pikirinen keıin osyndaı málimdeme jasady, dep jazady lenta.ru.

"Delıde, Mýmbaıda, Ýttar-Pradesh pen Gýdjarat aımaǵynda jankeshti shabýyldar jasaımyz" deıdi uıym ókilderi. Terrorıster qazir polısııa tarapynan qorǵalǵan úndi saıasatkerine jetý úshin balalardy jankeshti retinde paıdalanýǵa daıyn ekenin de aıtty.

Úndistannyń "Bharatııa Djanata" partııasynyń burynǵy ókili Nıpýr Sharma ótken aptada ulttyq telearnadaǵy pikirtalas kezinde Islamǵa qarsy jáne Muhammed paıǵambar týraly birneshe málimdeme jasaǵan. 

Atalǵan málimdemeden soń Iran, Saýd Arabııasy jáne Birikken Arab Ámirligi elderi men Úndistan arasynda dıplomotııalyq janjal týyp, Nıpýr Sharma qyzmetinen bosatyldy.