Mınıstr málimdemesi. Qazaq mektepterinde birinshi synyptar orys, aǵylshyn tilin oqymaıdy

Jalpy bilim beretin mektepterdegi úsh tildi oqytý baǵdarlamasyna ózgeris enedi. Bul týraly bilim jáne ǵylym mınıstri Ashat Aımaǵambetov nur.kz basylymyna bergen suhbat barysynda aıtty.

Mınıstrdiń sózinshe, endi balalar úsh tildi kezeń-kezeńimen úırenetin bolady.

– Bastaýysh mektepte tilderdi oqytý týraly qabyldanǵan sheshimniń tıisti ǵylymı negizdemesi bar. Budan qandaı da bir sebep izdeýdiń qajeti joq. Bul – tek ǵylym, dıdaktıka. Bala birinshi synypqa kelgende birden úsh tildiń – qazaq, orys jáne aǵylshyn tilderiniń álippesin bastaıdy. Al bul alty jasar balaǵa óte aýyr. Biz sońǵy jyldary monıtorıng júrgize kele, basqa sheshim qabyldaý qajettigin kórdik. Jańa oqý jylynan bastap memlekettik tilde oqıtyn balalar aldymen qazaq, ıaǵnı ana tilin meńgeredi. Olar oqý men jazýdy úırenip alǵan soń ǵana ekinshi synypta orys tilin úırense, áldeqaıda jeńil bolady. Al úshinshi synypta latyn qarpindegi úshinshi tildi meńgerý odan da jeńil bolady. Bul bizdiń usynystarymyz, aldaǵy ýaqytqa qoıǵan josparlarymyz, – dedi mınıstr.