"Armııaǵa jibermeńizder": Qaıtys bolǵan sarbazdyń týystary Toqaevtan kómek surady

Keshe Mańǵystaý oblysynyń Beıneý shekara qyzmetinde merzimdi áskerı  qyzmet atqarǵan taǵy bir sarbaz qaıtys bolǵany týraly aqparat taraǵan edi. Keıin shekara qyzmetindegi sarbaz Teshebaev Edil Baqytuly sýısıd jasaǵany habarlandy. Áskerı bólimdegiler marqumnyń Túrkistan oblysy Saryaǵash aýdanynda turatyn otbasyna eki túrli habar aıtqan. Tipti áskerı bólimdegiler jaqyndaryna Edil Baqytuly jazyp ketken dep túrli hattar jibergen. Alaıda týystary Ulysmedia.kz portalynyń tilshisine bergen suhbatta hattaǵy jazylǵan ýaqyt durys kórsetilmegenin, jazý marqumǵa tıesili emesin aıtqan. 

Saıttyń deregine súıensek, marqum qaıtys bolar kún aldynda keshke tanystarynan, týystarynan aqsha suraǵan.

UQK Shekara qyzmeti taratqan aqparatta sýısıdtiń sebebi áskerı qyzmet ótkerýmen baılanysty emestigi aıtylady.

"Otbasylyq-turmystyq problemalar bolǵan. Quqyq qorǵaý organdary qajetti tergeý amaldaryn júrgizýde. Shekara qyzmetiniń basshylyǵy men jeke quramy áskerı qyzmetshiniń týystary men jaqyndaryna qaıǵyryp kóńil aıtady, qaza tapqan adamnyń otbasyna qajetti kómek kórsetý sharalaryn qabyldaýda" delingen habarlamada.

Týystarynyń aıtýynsha, Edil Baqytuly áskerge óz erkimen, keleshekte áskerı bolamyn degen armanmen barǵan. 

"Meni únemi jeshe dep ataıtyn. Sońǵy hatynda «jeńge» dep jazyp qoıǵan. Ol hatty Edil jazbaǵan. Pocherki onyki emes. Data men ýaqyty da sáıkes kelmeıdi. Edil hatty áripterin tastap, tastap jazatyn. Bizge kelgen hatta asyqpaı, «gramotno» jazǵan. Taıaq jep, óleıin dep júrgen adam, ábden qorlyq kórgen adam (Perızat kóz jasyna erik berdi). Sándep jazyp otyra ma hatty. Áke-sheshem meniń jaǵdaıymdy bilse, ýaıymdap qalady, bilmeı-aq qoısyn deıtin edi. Ne bolyp qaldy, tynyshtyq pa, sharshadyń ba desem, joq jeńeshe, dep úndemeı tutqany qoıa salatyn edi. Úıdegiler estigende sengen joq. Atam aıǵaılap jerdi uryp jylady. Enem "meniń balam tiri, ózim baryp alyp qaıtamyn" dep senbeıdi", deıdi Edildiń jeńgesi Perızat Dúısebaı. 

Perızat Dúısebaı el ishinde "qanshama sarbazdyń osylaı jumbaq jaǵdaıda qaza bolǵany týraly aqparat baryn, onyń aqıqaty halyqqa jetpeı jatqanyn" aıtady.

"Sonsha jaǵdaıdy estip, ár balaǵa jan ashyp, myna jaqta úlken ájelerimiz aýyryp jatyr. Úıdiń bári astań-kesteń. Zar jylap kettik. Ashtyqpen qınap, qulsha jumsap, óltirip jibere berse, «ózin-ózi óltirdi» dep úıine qaıtaryp jibere berse ne bolady? Osynshama jaýyzdyqqa baratyndaı kim olar? 19 jyl baǵyp-qaqqan anasy biledi ǵoı minezin. Ol eshqashan ózine qol jumsamas edi. Balalaryńyzdy eshqashan jibermeńizder. Qarap otyryńyzdar. Jumysqa kirgizińizder. Armııaǵa – barsakelmeske jibermeńizder", - deıdi marqumnyń jeńgesi.

Sarbazdyń týystary prezıdent Qasym-Jomart Kemelulynan istiń ádil túrde tekserilýi úshin kómek suraıdy. 

«Prezıdent Qasym-Jomart Kemeluly! Sizden istiń qaralýyn, zańsyzdyqqa jol berilmeýin ótinip suraımyn. Kinálilerdiń jazalanýyn, Edildiń ádeıi óltirilgenin dáleldeýińizdi suraımyn. Mańǵystaý oblysy Beıneý aýdandyq shekara qyzmetin tekserýińizdi suraımyn. 8775 662 4588 nómiri – úıdegilerge kóńil aıtyp, úlkenderden keshirim suraýdyń ornyna nelikten «halyqqa jalǵan aqparat beresińder» dep aǵasyna aıǵaılaǵany, zańsyzdyqqa jol bergeni úshin jaýapqa tartýyńyzdy ótinip suraımyn», - deıdi Perızat Dúısebaı.

Marqumnyń denesi búgin túste jer qoınyna tapsyrylady.