«Baqylaýshylar mektebi-2022» jumysyn bastady

«Qoǵamdyq joba mekemesi» qoǵamdyq birlestigi táýelsiz baqylaýshylardyń daıyndyǵy týraly habarlady.

Almatyda 5 maýsym kúni ótetin referendýmda táýelsiz baqylaýshylardyń jumysyn uıymdastyrý jáne oǵan járdemdesý máseleleri boıynsha «Qoǵamdyq joba mekemesi» QB baspasóz konferensııasy ótti. Jıynǵa Almaty qalasynyń táýelsiz baqylaýshylar mektebiniń jetekshisi jáne «Qoǵamdyq joba mekemesiniń» dırektory Aleksandr Bratenkov, baqylaýshylar mektebiniń jattyqtyrýshysy Qarlyǵash Úseıinova, QR Fraıchazıng qaýymdastyǵynyń prezıdenti Beknur Kısıkov qatysty.

Baspasóz konferensııasy barysynda shara spıkerleri táýelsiz baqylaýshylar jumysynyń mazmunyna sholý jasap, olardyń kásibı deńgeıi men quzyretteri jaıly túsindirme berdi.

• Biz baqylaýshylar mektebiniń aıasynda myńǵa jýyq adamdy arnaıy daıyndyq baǵdarlamasynan ótkizdik. Bizdiń mektebimizdiń basty maqsaty – baqylaýshylardyń quqyqtyq mádenıetin qalyptastyryp, aldaǵy referendýmdaǵy olardyń quqyqtary men quzyretin QR zańnamasy negizinde tolyq úıretý. Jalpy baqylaýshylardyń quqyqtyq mártebesi QR Konstıtýsııasynyń "Saılaý týraly" zańynyń 20-babynyń birinshi tarmaǵynda kórsetilgen. Baqylaýshy bolýǵa nıettengen adamdarǵa osy zańnamany úlgige ala otyryp, semınar sabaqtaryn ótkizdik jáne áli ótkizip jatyrmyz, – dedi baqylaýshylar mektebiniń jattyqtyrýshysy Qarlyǵash Úseıinova.

Sondaı-aq, táýelsiz baqylaýshylardyń referendýmǵa qatysý erekshelikteri týraly da sóz qozǵaldy. Osy turǵyda «Baqylaýshylar mektebi-2022» jattyqtyrýshylary (partııalyq emes baqylaý ortalyǵynyń ádistemelik qoldaýymen) nıet bildirgen, qabiletti jáne sheber, zańnama talaptaryn adal saqtaıtyn jáne belsendi azamattyq ustanymy bar baıqaýshylardyń jańa sanatyn qalyptastyrýdyń maqsaty, mazmuny men erekshelikteri týraly aıtyp berdi.

• QR Konstıtýsııasynda kim táýelsiz baqylaýshy bola alatyndyǵy naqty kórsetilgen. Atap aıtqanda, qoǵamdyq birlestikterdiń ókilderi, saıası partııalardyń músheleri, halyqaralyq uıymdardyń músheleri jáne BAQ ókilderi baqylaýshy bola alady. Osy aqparatty baqylaýshy bolǵysy keletin adamdar eskerýi kerek. Táýelsiz baqylaýshylar daýys berý ortalyqtarynda barlyq jumystar zańnama negizinde ótkizilip jatqandyǵyna kóz jetkizip, onyń oryndalýyna ózindik úlesin qosady. Sondyqtan biz belsendi azamattyq ustanymy bar adamdardy baqylaýshy bolýǵa shaqyramyz, – dedi Aleksandr Bratenkov.

«Qoǵamdyq joba mekemesiniń» dırektory Aleksandr Bratenkovtyń aıtýynsha, «Baqylaýshylar mektebi-2022» daıyndaǵan táýelsiz baqylaýshylar Almatynyń barlyq saılaý ýchaskelerinde bolady.

Derekkóz: almaty-akshamy.kz