Foto: Vıdeodan skrınshot
Qazaqstandyq ǵalymdar arterııalyq patologııalardy emdeýdiń jańa ádisterin oılap tapty. Bulaı dep bilim jáne ǵylym mınıstrligi habarlady.
Ǵalymdardyń pikirinshe, tásil mıokard ınfarktisinen, ınsýlttan, trofıkalyq jaralardan, tómengi aıaqtyń gangrenasynan, sondaı-aq basqa da múshelerdiń múgedektigi men ólimdi azaıtady.
Ál-Farabı atyndaǵy Qazaq ulttyq ýnıversıtetiniń Qan tamyrlary patologııasy ortalyǵynyń qyzmetkerleri arterııalyq tamyrlardyń ótkizgishtigin qalpyna keltirýge arnalǵan qurylǵylar men ádisterge Qazaqstan Respýblıkasynyń eki patentin jáne Eýrazııalyq patenttik vedomstvonyń eki patentin alǵan.
– Bizdiń ónertabystarymyz "Arterııalyq tamyrlardyń ótkizgishtigin qalpyna keltirýge arnalǵan qurylǵy jáne ádis" jáne "Aterosklerotıkalyq blıashkalardy selektıvti ýltradybystyq dısseksııaǵa arnalǵan qurylǵy jáne arterııalyq tamyrlardyń ótkizgishtigin qalpyna keltirý ádisi" dep atalady. Emdeý ádisi mynadaı: biz arterııalarda jabyq qýys jasap, arterııa arqyly qan aǵyp jatqan kezde aterosklerotıkalyq blıashkalardy preparatpen eritemiz. Bul ónertabystar aterosklerotıkalyq blıashkalardy túbegeıli joıýǵa jáne birden birneshe arterııalardy tazalaýǵa múmkindik beredi, – deıdi ál-Farabı atyndaǵy QazUÝ Qan tamyrlary patologııasy ortalyǵynyń dırektory Oralbaı Dármenov.
Mınıstrlik málimdemesinde, bul qurylǵylardy qoldaný qan tamyrlaryn stentteý, sondaı-aq ómirlik mańyzdy músheler, ıaǵnı júrek, mı, tómengi aıaq arterııalary jáne t.b. tamyrlaryna ashyq shýnttaýshy operasııalar sııaqty belgili jáne kúrdeli ádistermen salystyrǵanda emdeýdiń salystyrmaly túrde tıimdi boljamdary men sapasyn beretini aıtylady.
– Jyl saıyn álemde stentter 60 mlrd dollarǵa satylady, biz usynatyn emdeý ádisi áldeqaıda arzanyraq bolady. Bizdiń ónim tehnıkalyq ta, quny jaǵynan da jaqyn analogtardan birneshe ese asyp túsedi, – deıdi professor Oralbaı Dármenov.
Mınıstrlik ǵalymdar qazirgi tańda klınıkalyq synaqtar men kommersııalyq óndiriske arnalǵan qurylǵylardyń zerthanalyq jáne óndiristik úlgilerin jasaýmen aınalysyp jatqanyn atap ótti.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir