E.Qoshanov: Referendým barshamyz úshin úlken syn

Májilis tóraǵasy Erlan Qoshanovtyń Qaraǵandy oblysyna jumys sapary bastaldy.

Palata spıkeri «AMANAT» partııasynyń oblystyq fılıaly ǵımaratynda óńir jurtshylyǵymen júzdesti.

Erlan Qoshanov aldaǵy referendým jaıly aıtyp, el taǵdyryn sheshetin aýqymdy reformalardyń mán-mańyzyn túsindirdi. Onyń aıtýynsha, memleket basshysy usynyp otyrǵan konstıtýsııalyq reformalardyń barlyq salaǵa qatysy bar.

– Taıaýda prezıdent jarlyǵymen Ulytaý oblysy qaıta quryldy. О́zderińizge belgili, qazirgi Qaraǵandy – alyp aımaq. Bir ortalyqtan mundaı óńirdi basqarýdyń tıimsiz tustary barshylyq. Shalǵaı eldi mekenderden oblys ortalyǵyna jetý qolaısyzdyq týdyratyn. Sondyqtan bul halyq únine qulaq asqan ádil ári tıimdi sheshim dep esepteımin. Degenmen, Qaraǵandy oblysy elimizdegi eń iri aımaqtyń biri bolyp qala beredi, – dedi Erlan Qoshanov.

Jıynda májilis tóraǵasy elimizdiń saıası ómirindegi úlken ózgeristerdi aıta kele, qazirgi álemde bolyp jatqan kúrdeli úderisterge beıimdelip, túrli synaqtarǵa daıyn bolýy kerektigin atap ótti.

– Qazir jahan jurty kúrdeli kezeńdi bastan keshýde. Búgingi tańda bizdiń memleketimizde de aýqymdy ózgerister bolyp jatyr. Prezıdent reformalary osy syn-qaterlerge berilgen naqty jaýap dep aıtýǵa bolady. Biz jańa ári ádiletti Qazaqstan qurýǵa bet burdyq, – dedi palata spıkeri.

Qazirgi tańda májilis depýtattary men «AMANAT» partııasynyń músheleri óńirlerde halyqpen kezdesýde.

– Jurtshylyq memleket basshysynyń bastamalaryn jaqsy qabyldap, qoldap jatyr. El bolashaǵyn aıqyndaıtyn osyndaı aýqymdy reformalardyń taǵdyryn halyqtyń ózi sheshýi kerek.  Osy oımen Memleket basshysy referendým jarııalady, – dedi palata spıkeri.

Sonymen qatar Erlan Qoshanov jasandy monopolııalardy túbegeıli joıyp, azamattarǵa teń múmkindik berý úshin memleket tarapynan úlken sharýa atqarylyp jatqanyna nazar aýdardy.

– Elimizde ashyq saıasattyń jańa kezeńi bastalaıyn dep otyr. Endi barlyq saıası kúshter saılaýshylardyń naqty suranysyna basymdyq beredi. Sonymen birge referendým memlekettiń jańa maqsattaryn júzege asyrý bolyp sanalady. Halyq elimizdiń saılaý júıesine senýi kerek. Bul – bılik legıtımdiginiń negizi. Saılaý saıası ómirimizdegi qalypty jaǵdaıda aınalýǵa tıis. Biz birte-birte osyǵan kele jatyrmyz, – dedi májilis tóraǵasy.

Palata spıkeri reformalardyń basty maqsaty azamattardyń konstıtýsııalyq quqyqtaryn qorǵaýdy negizge alatyn ádiletti qoǵam qurý ekenin atap ótti.

–  Qazir turǵyndardyń kópshiligi memlekettik organdardyń normatıvtik aktilerine kóńili tolmaı otyr. Olar ártúrli ınstansııalarǵa shaǵymdanýda. Adamdar ózderiniń konstıtýsııalyq quyqtary buzylyp jatyr dep esepteıdi. Referendýmnan keıin Konstıtýsııalyq sot qurylady. Ár azamat osy organǵa nemese Adam quqyqtary jónindegi ýákilge shaǵymdana alady. Ombýdsmenge konstıtýsııalyq mártebe beriledi. Endi olar óz konstıtýsııalyq quqyǵyn qorǵaý úshin elordaǵa kelmeı-aq, óńirlerdegi ýákilderdiń qyzmetine júgine alady. Ofıster barlyq oblysta ashylady, – dedi Erlan Qoshanov.

Odan ári májilis spıkeri saıası júıeni keshendi jańǵyrtý máselelerine nazar aýdardy. Onda Parlamenttiń rólin aıtarlyqtaı kúsheıtýge erekshe mán berilip otyr.

Erlan Qoshanov búginde parlament kez-kelgen aýdannyń bıýdjetin teksere almaıtynyn, Parlament depýtattarynda mundaı ókilettik joq ekenin aıtty. Májilis tóraǵasynyń aıtýynsha, óńirlerge respýblıkadan qyrýar qarjy bólinýde. Al el bıýdjetin bekitetin organ úshin onyń qalaı jumsalatynyn túsiný kerek.

– Endi Esep komıteti men barlyq tekserý komıssııalary Aýdıtorlyq palataǵa biriktirilip, jylyna eki ret májilis depýtattary aldynda jarııa túrde esep beretin bolady. Bul májiliske baqylaýdy kúsheıtýge múmkindik beredi. Osylaısha  respýblıkalyq, oblystyq jáne jergilikti bıýdjetterdi baqylaı alady, – dedi palata spıkeri.

Sóz sońynda Erlan Qoshanov oblys jurtshylyǵyn respýblıkalyq referendýmǵa belsendi qatysyp, tarıhı tańdaý jasaýǵa shaqyrdy.

Kezdesýden keıin «AMANAT» partııasynyń tóraǵasy jeke qabyldaý ótkizip, oblys turǵyndarymen sóılesti.

Palata spıkeri jumys sapary barysynda Temirtaý qalasynyń jurtshylyǵymen kezdesti. Onda 20 myń emdelýshige arnalǵan jańadan ashylǵan emhanaǵa bardy. Erlan Qoshanov em qabyldaıtyn kabınetterdi aralap, dárigerlermen áńgimelesti. Odan keıin sport dene shynyqtyrý-saýyqtyrý keshenine bardy.

Kezdesý barysynda Temirtaý qalasynyń belsendisi Oleg Gýsev Qazaqstan álemde bolyp jatqan barlyq qıyndyqtarǵa qaramastan, kópultty qoǵamda beıbitshilik pen kelisimdi saqtaı otyryp, barsha qıyndyqtarǵa tótep bere aldy dedi.

– Eń bastysy – ishki saıası turaqtylyqty saqtaý. Prezıdentimiz óte jaýapty jáne tez sheshim qabyldaıdy. Biz oǵan birneshe ret kýá boldyq. Biz onyń ishki saıası turaqtylyq pen el birligin saqtaýǵa baǵyttalǵan saıasatyn qoldaımyz, ­– dedi ol.

Sonymen qatar májilis tóraǵasy Erlan Qoshanov "Lenın" atyndaǵy shahta kenshilerimen kezdesti.

О́ńirdegi iri kómir shyǵaratyn zamanaýı shahta qyzmetimen tanysqannan keıin, 770 metr tereńdiktegi shahtaǵa túsip, kenshilermen referendým týraly áńgimelesti.

О́z kezeginde kenshiler memleket basshysynyń saıasatyn qoldaıtyndaryn jetkizip, 5 maýsymda ótetin naýqanǵa qatysýǵa shaqyrdy.

Májilistiń baspasóz qyzmeti