Ashat Oralov soltústikqazaqstandyq agrarlardy referendýmǵa belsendi qatysýǵa shaqyrdy

Búgin «AMANAT» partııasynyń Atqarýshy hatshysy Ashat Oralov Soltústik Qazaqstan oblysynda jergilikti agrarlarmen, zııaly qaýym ókilderimen, BPU tóraǵalarymen jáne partııa aktıvimen birqatar kezdesý ótkizdi.

Ashat Oralov Maǵjan Jumabaev atyndaǵy aýdannyń Polýdınskoe aýylyndaǵy sút-taýar fermasynyń alańynda oblystaǵy aýyl sharýashylyǵy taýar óndirýshilerimen kezdesip, aldaǵy konstıtýsııalyq reformanyń mańyzyn talqylady.

«Konstıtýsııalyq reforma – «Jańa Qazaqstandy» qurýdyń naqty mehanızmi. Ata Zańymyzda jer halyqtyń menshigi dep kórsetiledi. Bul – óte mańyzdy qadam. Soltústik Qazaqstan oblysynda halyqtyń basym bóligi aýyl sharýashylyǵymen aınalysady. Sondyqtan 5 maýsym kúni ótetin referendýmǵa oblys turǵyndary belsene qatysady degen oıdamyz», dedi «AMANAT» partııasynyń atqarýshy hatshysy.

О́z kezeginde, osyndaǵy sharýa qojalyqtary biriniń basshysy Altynbek Saparov turǵyndar el damýyndaǵy jańa kezeńdi referendýmmen baılanystyratynyn atap ótti.

«Halyq bolyp jatqan ózgeristerdi kórip otyr jáne Táýelsizdigimizdi odan ári nyǵaıtyp, elimizdi damytý úshin Konstıtýsııaǵa qajetti ózgerister engizýdi qoldaýǵa daıyn», dedi Altynbek Saparov.

Budan soń atqarýshy hatshy óńirdiń zııaly qaýym ókilderimen jáne partııa ardagerlerimen júzdesti. Kezdesýge qatysýshylar Ata Zańǵa túzetýler engizýge qatysty jalpyhalyqtyq daýys berý «Jańa Qazaqstandy» qurýda negizgi ról atqaratynyn atap ótti.

Sonymen qatar, Ashat Oralov bastaýysh partııa uıymdarynyń tóraǵalarymen de kezdesti. Ol partııanyń qozǵaýshy kúshi – BPU-nyń bazasynda jalpyulttyq referendýmnyń máni týraly túsindirý jumystary belsendi júrgizilýge tıis ekenin atap ótti.

Osy kúni óńirdiń partııa aktıvimen kezdesý ótti. Búgingi tańda oblysta quramynda 28 myńnan astam partııa múshesi bar 246 BPU jumys isteıdi.

«AMANAT» partııasynyń baspasóz qyzmeti