Foto: Ashat Aımaǵambetovtyń Facebook paraqshasynan
Bilim jáne ǵylym mınıstri Ashat Aımaǵambetov mektep ashanalaryndaǵy birqatar problemalar týraly aıtty. Sózinshe, olar normatıvtik quqyqtyq aktiler deńgeıinde sheshiledi.
Mınıstr mektep ashanalarynda qolma-qol aqshasyz tólem júıesin engizý talabyn bekitkenin, alaıda qazir tólem júıeleri óshirilip, paıdalanylmaıtynyn atap ótti. Onyń paıymynsha, balalarda qolma-qol aqsha bolmaýy gıgıenanyń saqtalýyna ári kezektiń tez jyljýyna kómektesedi, túrli qaýipterden saqtap, ata-analarǵa shyǵyndardy baqylaýdy jeńildetedi.
Aımaǵambetov sondaı-aq ashanadaǵy baǵanyń qymbattyǵy, ashanalardy jalǵa alý men densaýlyq saqtaý mınıstrligi tyıym salǵan ónimderdiń saýdasy máselelerin atap ótti.
"Mektep ashanasynda 0,5 lıtr sý 300 teńgeden nemese bálishter men toqashtardyń dúkenderdegi baǵadan joǵary baǵada satylatyny suraq týyndatady. Bir qalada birdeı ónim baǵasynda 50-70%-ǵa deıin aıyrmashylyq bolýy múmkin. Keıbir óńirler ashanalardy memlekettik-jekemenshik áriptestik arqyly jeke kásipkerlerge berip júr. Biz MJÁ-niń damýyn qoldaımyz. Biraq keıde bul konkýrsty ótkizbeý úshin jáne ashanany kásipkerge tikeleı (10-15 jylǵa) berý úshin jasalady. Birinshiden, biz konkýrssyz Jeke qarjylyq bastama (JQB) boıynsha emes, konkýrs ótkizilý kerek dep sanaımyz. Ekinshiden, salym somasy az mólsherde, mysaly, 5-7 mln teńge emes, tıisti kólemde bolýy mańyzdy. Kórsetiletin qyzmetterdiń sapasyn este saqtap, bul qarajattar tońazytqyshtar, plıtalar, ústelder men oryndyqtardy satyp alýǵa jumsalatynyn túsiný mańyzdy. Iаǵnı, saıyp kelgende kásipker óz jumysyna qarajat salady. Úshinshiden, biz jumystyń aqylǵa qonymdy merzimderin belgilegendi qoldaımyz.Ashanany 15-20 jylǵa kelisimshart jasaý suraq týǵyzady. Mektep ashanalarynda Densaýlyq saqtaý mınıstrliginiń buıryǵymen tyıym salynǵan ónimderdi satý (mysaly, fastfýd, gazdalǵan sýsyndar, chıpsy jáne t.b.) jaǵdaılary bar. Mınıstrliktiń qyzmetkerleri birneshe oblysqa baryp, birqatar mektepte osyndaı faktilerdi anyqtady. Ásirese Túrkistan oblysynda. Mundaı faktiler anyqtalǵan jaǵdaıda dereý SES organdaryna habarlasý qajet.
Onyń aıtýynsha, osy problemalardy normatıvtik deńgeıde sheshý úshin jumys toby qurylǵan.
"Biz zańnamaǵa birqatar tolyqtyrý engizýge bastama jasadyq, olardyń sheńberinde arnaıy normalar bekitiledi. Bul normalar - ashanalardaǵy býfet ónimderiniń baǵasyn retteý, ashyq konkýrstar jáne aqylǵa qonymdy kezeńge MJÁ arqyly ashanalardy berý, qolma-qol aqshasyz tólemdi jáne tamaqtanýdyń tıisti sapasyn qamtamasyz etý. Biz kásipkerlerdiń múddelerimen de sanasý keregin túsinemiz, biraq biz úshin balalar árqashan birinshi orynda. Demek, bul olardyń quqyqtary men múddelerin qorǵaýdy bildiredi. Mınıstrlik atalǵan baǵyttar boıynsha jumysty jalǵastyrady" deıdi Aımaǵambetov.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir