• USD 468.56

  • EUR 497.56

  • RUB 7.3

  • CNY 67.18

29 Naýryz, 17:52:04
Almaty
+35°

Túrkmenstandyq áıelderge kirpik jabystyrýǵa, tatýaj, botoks jasatýǵa zań júzinde tyıym salynǵan bolatyn. BBC derekterine súıensek, jabyq memlekettegi áıelderge qatysty tyıymdar kún sanap artyp jatyr. 

Bul bastamalardy 12 naýryzda ákesi Gýrbangýly Berdimuhamedovtyń ornyna kelgen 40 jastaǵy prezıdent Serdar Berdimuhamedov kótergen. Áıelderge qatysty buıryqtar men tyıym – Túrkmenstan bıliginiń "ata dástúri" desek te bolady. Sebebi mundaı jaǵdaı Túrkmenstannyń alǵashqy prezıdenti bılik etken kúnnen bastap jalǵasyp keledi. 

"Túrikmender Serdar Berdimuhamedov ákesinen góri progressıv joldy ustanady dep úmittendi, biraq olar qatty qatelesti", delingen Halyqaralyq josparly ata-ana federasııasynyń málimdemesinde.

Federasııa dereginshe, Túrkmenstanda túsik jasatýǵa da tyıym salynǵan. Al júktilikti toqtatýdyń ruqsat etilgen merzimin 12 aptadan 5 aptaǵa deıin qysqartqan. Biraq mundaı erte merzimde kóbine áıelder óziniń júkti ekenin bilmeı jatady. 

"Ulttyq dástúrge qaıshy keledi"

Túrkmenstandaǵy áıelder mamyr aıynan bastap taksıdiń artqy oryndyǵyna otyrýǵa májbúr. Áıelderdiń aıtýynsha, taksı júrgizýshilerine taksıpark basshylarynan osyndaı buıryq kelip túsken. Alaıda memlekettik qujattarda mundaı buıryq týraly aqparat kórsetilmegen. 

"2017 jyldan beri Túrkmenstandaǵy áıelderge júrgizýshi kýáligi berilmeı keledi. Tipti, júrgizýshi kýáliginiń berilmeý sebebin de túsindirmeıdi. Sol sebepti qazir salynyp jatqan tyıymdar men buıryqtar kópshilikti tańǵaldyrmaıdy" deıdi Turkmen.news saıtynyń redaktory Rýslan Mıatıev. 

Onyń aıtýynsha, kóliktiń aldynǵy oryndyǵyna otyrǵan áıelderdi polıseı toqtatyp, eskertý jasaǵan. 

Aıyppuldar men jumystan qýý

Memlekettik qyzmettegi áıelderdiń tyrnaq boıap, tatýaj jasaýyna tyıym salynǵan.  "Radıo Azatlyk" saıtynyń málimetinshe, botoks pen tatýaj jasaǵan 20 bortserik áıeldi jumystan shyǵaryp jibergen. Al sulýlyq salonynyń basshylaryna eskertý jasalǵan. Eger zańǵa baǵynbaıtyn bolsa, aıyppul salynady nemese 15 kúnge qamalady. 

Kýágerler qoǵamdyq oryndarda polısııa qyzmetkerleri tekseris júrgizip, buıryqqa baǵynbaǵan áıelderge eskertý jasap júrgenin de aıtyp jatyr. 

Túrkmenstandaǵy halyqaralyq kompanııada jumys isteıtin Ýmıda (esimi ózgertilgen) esimdi turǵyn qazir tekseris tek memlekettik qyzmettegi áıelder arasynda qatań júrip jatqanyn aıtady. Ázirge Ýmıda jumys isteıtin kompanııada tyrnaq boıap, kirpik jabystyrýǵa tyıym salynbaǵan kórinedi. 

Túrkmenstan bıligi áıelderdiń boıanýynan bólek qoǵamdyq orynda sezimin bildirýi de ulttyq qundylyqqa qarsy keledi dep esepteıdi. Sheteldik BAQ-tyń dereginshe, kóshede qol ustasyp júrgen jastar qamaýǵa alynǵan. Qamaýǵa alynǵan jastardy "aldaǵy ýaqytta kóshede qol ustasyp, sezimin ashyq bildirmeımiz" degen mátinde qolhat jazdyryp alǵannan keıin bosatqan. 

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir