Májilis tóraǵasy: Reformalardyń mán-mańyzyn túsindirýde partııanyń áleýetin paıdalanýymyz kerek

«AMANAT» partııasynyń tóraǵasy, májilis spıkeri Erlan Qoshanov Semeı qalasyna jumys sapary barysynda partııa fılıalyna baryp, amanattyqtarmen kezdesti. Onda partııa tóraǵasy prezıdenttiń Abaı oblysyn qurý týraly tarıhı sheshimi aımaqtyń áleýmettik-ekonomıkalyq ómirine tyń serpilis ákeletinine nazar aýdaryp, bul fılıal jumysyn da jandandyra túsetinin aıtty.

Jıynda Erlan Qoshanov prezıdent reformalaryn halyqqa túsindirýde «AMANAT» partııasynyń músheleri osy jumystyń aldyńǵy shebinde júrýge tıis ekenin atap ótti.

«Jalpy alǵanda bul reformalar qoǵam tarapynan jan-jaqty qoldaý tabýda. О́ıtkeni, ózgerister eń áýeli halyqtyń suranysyna negizdelgen. Memleket basshysynyń reformalary ár adamǵa teń múmkindik berýge, ádiletti qoǵam qurýǵa baǵyttalǵan», – dedi ol.

Sonymen qatar partııanyń aldynda aýqymdy mindetter turǵanyna erekshe mán berdi.

«Memleketimiz jańa kezeńge qadam basqaly tur. Halyqtyń da kózqarasy ózgerýde. «AMANAT» bul prosesterden shet qalmaýy qajet. Partııanyń baǵyt-baǵdaryn prezıdenttiń ózi aıqyndap berdi.Bizge jasandylyqtan, bıýrokratııa men kózboıaýshylyqtan arylǵan jón. Biz naqty istermen aınalysýymyz kerek», – dedi partııa tóraǵasy.

Erlan Qoshanov «AMANAT» partııasy halyqtyńmúddesin qorǵaıtyn partııa ekenin aıta kele, óńirlerdegi birqatar máselege nazar aýdardy. 

«Kóp jerde jaıylym máselesiniń ózektiligi artyp otyr. Biz osyǵan belsene kirisýimiz kerek.Májilis depýtattary bul jumysty bastap ketti.Endi jergilikti fılıaldarymyz da osyny sheshýge aralasqany jón», – dedi Erlan Qoshanov.

Sondaı-aq kezdesýde partııa Tóraǵasy menshik ıeleri birlestigi máseleleri áli kúnge deıin júıeli sheshimin tappaı otyrǵanyn atap ótti.

Erlan Qoshanovtyń pikirinshe, kóptegen qalada birlestikti engizý barysynda qıyndyqtar týyndap, turǵyndardyń kóńili tolmaı otyr. Partııa jergilikti ákimdiktermen birge osy jumysqa belsene aralasýy kerek. Bastama kóterip, problemanyń sheshilý joldaryn usynýlary tıis.

Kezdesýde partııa tóraǵasy jastardy jumyspen qamtý máselesin kóterip, mobıldi qoǵamdyq qabyldaýlardyń jumysyn kúsheıtý jóninde tapsyrma berdi.

«Birinshi kezekte, ol jumyssyz, mamandyqsyz, úısiz-kúısiz júrgen jastarǵa arnalýy kerek. Biz olardyń kelýin kútpeı, ózimiz solarǵa qaraı qadam jasaýǵa tıispiz. Myńdaǵan jasty qoldaýǵa baǵyttalǵan túrli memlekettik baǵdarlama bar ekenin kópshilik bilmeıdi. Osy jumysty partııa fılıaldary basty nazarda ustaýy qajet dep esepteımin», – dedi Erlan Qoshanov.