• USD 470.9

  • EUR 496.94

  • RUB 8.83

  • CNY 70.33

25 Maýsym, 04:27:27
Almaty
+15°

Eki jyldan beri qoǵamdyq uıym retinde jumys istep kele jatqan "El men Jer" qozǵalysy saıası partııaǵa aınalmaq. Almatyda ótken baspasóz máslıhatynda qozǵalys jetekshisi, saıasatker Baltash Tursymbaev osyndaı málimdeme jasady. Yntaly top qatarynda rejısser Erkin Raqyshev te bar.

Saıasatker mundaı qadamǵa qoǵamdyq uıymnyń aımaqtardaǵy ókilderinen túsken túrli usynystar sebep bolǵanyn aıtady. Ol partııa tirkelip, aldaǵy parlament saılaýyna qatysyp jatsa, depýtattyq mandattyń 30-40 paıyzyn alatynyna senimdi ekenin jetkizdi. Sózinshe, qoǵamdyq uıym buǵan deıin eldiń damýy men jer máselelerin kótere júrip 60 myńdaı jaqtas jınaǵan. Endi 12 mıllıon elektorattyń aýdan, aýyldyq eldimekenderde turatyn 4 mıllıonynyń daýsyn alýǵa nıetti.

 

Saıasatkerdiń aıtýynsha, qurylǵaly jatqan partııanyń ereksheligi aımaqtardan shyqqan, aýyldyń jaıyn biletin azamattarmen jumys isteıtininde. Qurylǵaly jatqan kóptegen partııalar negizinen oblys ortalyqtarynan ary barmaıdy degen ol "El men Jer" aýyldardy aralap, aýyl máselesin kóteretinin jetkizdi.

 

Baspasózge arnalǵan habarlamada partııanyń basty maqsaty – eldi tyǵyryqtan alyp shyǵyp, jarqyn bolashaqqa bastaıtyn baǵdarlamany júzege asyrý, ulttyq ıdeologııa negizin qalaý ekeni jazylǵan. Sondaı-aq partııa áleýmettik turmysy tómen jandardyń múddesin qorǵap, ádiletti qoǵam ornatý úshin kúresetini aıtylady.

Jıyn barysynda partııanyń baǵdarlamasy jasalyp qoıylǵanyn, aldaǵy ýaqytta taǵy tolyqtyrylyp, shyńdalyp, túzetile túsetini habarlandy.

Baltash Tursymbaev partııa baǵdarlamasy naqty 4 máselege taban tireıtinin málim etti.

1) Eldi damytý. Aýyldy qalpyna keltirý, damytý; aýyl sharýashylyǵy ónimderi óndirisin óristetý; kezinde jekemenshikke ótip ketken iri jer ıeleriniń menshigindegi jerdi halyqqa qaıtarý;

2) Jemqorlyqpen kúres. N.Nazarbaev áýleti men onyń aınalasyndaǵy 100 shaqty adam ıelenip otyrǵan ken oryndaryn memleketke qaıtarý;

3) Jańa konstıtýsııa qabyldaý. Oǵan 1993 jylǵy konstıtýsııany negiz etip alý, sol arqyly sýperprezıdenttik basqarý formasynan ketý;

4)  Ákimderdi saılaý. Halyq ishinen shyqqan, eldiń tynysyn, máselesin biletin, ózin saılaǵan halyqtyń aldynda jaýapkershilik alatyn adamdy jergilikti jerlerge basshy etip qoıý;

Saıasatker aldaǵy saılaý taza ótetinine senim bildiretinin, qoǵam óziniń talabymen bılikti saılaýdy ádil ótkizýge mindetteý kerek ekenin atap ótti.

Sondaı-aq ol "El men Jer" partııa qurǵysy kelip júrgen ózge de bastamashyl azamattardy qoldaıtynyn, Qazaqstanda kóp partııa bolýy kerektigin, bılikpen ymyraǵa kelmeıtinin aıtyp otyr.

Qazaqstanda tirkelgen 5 partııa bar. Olardyń úsheýiniń ókilderi parlamentte otyr. Táýelsiz sarapshylar resmı tirkelgen partııalardyń qatarynda balama pikir bildiretin, oppozısııalyq kózqarastaǵy saıası toptardyń joǵyn jıi synaıdy. Oppozısııalyq saıasatker Janbolat Mamaı men onyń jaqtastary eki jyldan beri ózderiniń "Demokratııalyq partııa" dep atalatyn saıası uıymyn tirkeı almaı júr. Jýyrda ádilet mınıstrligi tirkeýge qujat tapsyrýǵa kelgen oppozısııalyq saıasatker Jasaral Qýanyshalın bastaǵan "Alǵa Qazaqstan" partııasynyń qujattaryn tolyq emes dep keri qaıtardy. Qańtar oqıǵasynan keıin birneshe saıasatker men qozǵalys partııa qurǵysy keletini týraly resmı málimdeme jasady. Olardyń qatarynda saıasatker "Baıtaq-Bolashaq" ekologııalyq alıansynyń jetekshisi Azamathan Ámirtaı (Baıtaq), eks-nurotandyq eks-depýtat Nurjan Áltaev (El tiregi), saıasattanýshy, eks-sheneýnik Sanjar Boqaev (Namys), qoǵam belsendisi Muhtar Taıjan (Jer qorǵany), jýrnalıst, qoǵam belsendisi Sáýle Ábildahanqyzy (Aq júnis áıelder partııasy) "Naǵyz Atajurt" uıymynyń ókilderi, saıasatker, bıznesmen Bolat Ábilov (Bizdiń tańdaý) bar. Ádilet mınıstrligi búginde "El tiregi", "Namys", "Baıtaq" jáne "Halyq derbestigi" (Jumataı Álıev) partııalary tirkelýdiń birinshi kezeńinen ótkenin habarlaǵan. Tipti Jumataı Álıevtiń partııasy 20 myń qol jınap, quryltaı ótkizip qoıǵan. Biraq bul jaıynda aqparat quraldary men áleýmettik jelide eshqandaı aqparat joq.

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir