Mınıstrlik balalar kúnine oraı járdemaqy beriletini týraly aqparatqa baılanysty málimdeme taratty

"1 maýsym – Halyqaralyq balalardy qorǵaý kúnine oraı 18 jasqa deıingi balalary bar otbasylarǵa «Kaspi gold» mobıldi qosymshasyndaǵy áleýmettik shot arqyly birjolǵy járdemaqy tólenetini týraly messendjerler men áleýmettik jelilerde taratylyp jatqan aqparat shyndyqqa janaspaıdy" delingen mınıstrlik aqparatynda.

Vedomtsvo sondaı-aq "Kaspi gold" qosymshasynda respýblıkalyq bıýdjetten bala týǵanda beriletin birjolǵy járdemaqyny resimdeý boıynsha memlekettik qyzmet júzege asyrylatynyn jetkizdi.

Birinshi, ekinshi, úshinshi bala týǵanda beriletin járdemaqy mólsheri 116 394 teńgeni (38 AEK), tórtinshi jáne odan keıingi balaǵa – 192 969 teńgeni (63 AEK) quraıdy.

Sondaı-aq atalǵan qosymsha arqyly azamattar jumys istemeıtin áıelder úshin bir jasqa deıingi bala kútimi boıynsha járdemaqy resimdeı alady. Járdemaqy mólsheri otbasyndaǵy balalar sanyna baılanysty saralanady. Osy jyly birinshi balaǵa aı saıyn 17 643 teńge (5,76 AEK), ekinshi balaǵa – 20 860 teńge (6,81 AEK), úshinshi balaǵa – 24 045 teńge (7,85 AEK), tórtinshi jáne odan keıingi balaǵa – 27 261 teńge (8,90 AEK) tólenedi.