Almatynyń etnomádenı birlestikteri referendým ıdeıasyn qoldaıdy

Memleket basshysy bastamashylyq etken Konstıtýsııaǵa ózgerister engizý jónindegi referendým jańa Qazaqstannyń qurylys prosesinde mańyzdy kezeńge aınalady. Bul týraly Almatydaǵy qalalyq Dostyq úıinde ótken etnomádenı birlestikter ókilderiniń otyrysynda aıtyldy.

– Memleket basshysy Konstıtýsııaǵa engizýdi usynǵan ózgerister saıası básekelestikti kúsheıtýge, el azamattaryna jańa jáne teń múmkindikter jasaýǵa múmkindik beredi, – dedi moderator, Almaty qalasynyń Orys mádenı ortalyǵynyń tóraǵasy Vsevolod Lýkashev.

Ol referendýmǵa qoıylǵan ıdeıalardy prezıdent bıylǵy joldaýynda aıtqanyn eske saldy. Olardyń negizinde «ár túrli kózqarastar, biraq birtutas ult» qaǵıdatynyń tezısi jatyr.

Vsevolod Lýkashevtiń pikirin qalalyq uıǵyr ortalyǵy tóraǵasynyń orynbasary, Almaty qalasy QHA Analar keńesiniń tóraıymy Mahınýr Israılova da qoldady.

– Búginde elimiz óz damýynyń biregeı kezeńinde tur. Bul – elimizdiń saıası jáne ekonomıkalyq ómirindegi aýqymdy jasampaz ózgerister kezeńi. Bizdiń mindetimiz – bul prosesti birlesip qoldaý, – dep atap ótti Mahınýr Israılova.

Etnomádenı birlestikterdiń kóshbasshylary Almaty qalasynyń barlyq turǵyndaryn birigýge, azamattyq ustanym tanytýǵa jáne aldaǵy referendýmǵa belsendi qatysýǵa shaqyrdy.