Darıǵa Nazarbaeva men Bolat Nazarbaevtyń uly eldegi eń baı adamdardyń qatarynda

Forbes Kazakhstan jýrnaly eldegi dáýletti adamdardyń dástúrli reıtıngin jarııalady. Reıtıngtiń aldyńǵy sapynda aıtyrlyqtaı ózgeris joq. Kóshti ádettegideı Vladımır Kım ($5 mlrd) bastap, Tımýr Qulybaev ($3,9 mlrd), Dınara Qulybaeva ($3,9 mlrd), Vıacheslav Kım ($3,2 mlrd), Mıhaıl Lomtadze ($3 mlrd), Bolat О́temuratovtarmen ($2,8 mlrd) jalǵasyp kete beredi.

Forbes tergelip jatqanyna baılanysty dúnıe-múlki buǵattalýy múmkin bolǵandyqtan tizimine Qaırat Satybaldy (2018 jylǵy reıtıngte №47) men Qaırat Boranbaevty (2021 jylǵy reıtıngte №14) qospaǵan. Al olardyń ornyn toltyrǵandar arasynda eks-prezıdent Nursultan Nazarbaevtyń jaqyndary bar.

Máselen, Darıǵa Nazarbaeva reıtıngke qaıta oralyp, 13 satyǵa jaıǵasqan. Onyń baılyǵy 584 mıllıon dollarǵa baǵalanǵan. Onyń túrli salada kásipteri kóp, ásirese medıakeńistikte birneshe iri jobalarǵa ıelik etedi. "Evropa plıýs Kazahstan", "Teleradıokompanııa Radıosıtı", "Nezavısımyı Televızıonnyı Kanal" (NTK telearnasy) sekildi kompanııalar tolyqtaı nemese jartylaı menshiginde. Budan bólek "DLS Group holdıngtik kompanııasy", "Regıon-Medıa", "A-Service Management" (elordadaǵy Dýman qonaq úıi) kompanııalarynyń keıbirine bútindeı, keıbirine jartylaı ıelik etedi.

Reıtıngke engen Nazarbaev áýletiniń kezekti ókili Bolat Nazarbaevtyń uly – Nurbol Nazarbaev. 38 jastaǵy kásipkerdiń baılyǵy 160 mıllıon dollarǵa teń. "Prime Capital Invest", "Korporasııa Úsh Qońyr Invest" kompanııalarynyń ıesi. "PLS ınvestısıonno-stroıtelnaıa kompanııa", "PLS-TM" kompanııalary negizgi aksıonerleriniń biri.

Budan bólek reıtıngke Darıǵa Nazarbaevanyń úlken uly Nurálı Álıev bıyl da engen. Ol 263 myń dollar baılyqpen tizimniń 26 satysynda tur.

Reıtıng basyndaǵy Tımýr Qulybaev Nursultan Nazarbaevtyń kúıeýbalasy, Dınara qyzy ekeni bárine belgili. Sondaı-aq joǵaryda aty atalǵan Vladımır Kım, Vıacheslav Kım, Bolat О́temuratov sekildi mıllıarderler N.Nazarbaevtyń jaqyn adamdary degen áńgime bar. Sondaı-aq el arasynda Nursultan Nazarbaevtyń ózi de eldegi eń baı adamdardyń biri ekeni týraly áńgime jeldeı esedi. Sońǵy ýaqytta Nursultan Nazarbaevtyń baılyǵy týraly túrli jýrnalıstik zertteýler shyǵa bastady. Olarda NÁN tek ózi basqaratyn qorlar arqyly ǵana birneshe mıllıard dollarǵa ıelik etetini týraly aıtylady.