– Tuńǵysh Prezıdent mártebesi máselesine keletin bolsaq, Konstıtýsııada bul Konstıtýsııamen jáne konstıtýsııalyq zańdarmen retteledi dep jazylǵan. Jumys toby bul mártebeni Konstıtýsııanyń ózinde anyqtaý kerek, bul normany naqtylaıtyn zańdarǵa emes, Konstıtýsııanyń ózine júginý kerek degen qorytyndyǵa keldi. Qazaqstan Respýblıkasynyń Tuńǵysh Prezıdenti – táýelsiz Qazaqstannyń negizin qalaýshy. Iаǵnı, bul mártebe belgilendi. Menińshe, bul óte mańyzdy, óıtkeni onyń sińirgen eńbegin, obektıvti faktini bárimiz de kórdik, búkil álem kórdi, ol Konstıtýsııada bekitiledi, – dedi Ábdirasylov.

Qazaqstanda eks-prezıdent Nursultan Nazarbaevqa aıryqsha mártebe beretin konstıtýsııalyq zań onsyz da bar. 2000 jyly qabyldanǵann "Qazaqstan Respýblıkasynyń Tuńǵysh Prezıdenti - Elbasy týraly" zań Nursultan Nazarbaevqa aıryqsha quzyretter men kepildikter beredi.

Máselen, zańǵa sáıkes N.Nazarbaev aıryqsha erekshelik belgisi - Altyn juldyz jáne "Otan" ordenine, "Halyq qaharmany" (Narodnyı geroı) ataǵyna ıe.

♦ Qazaqstan Respýblıkasy Tuńǵysh Prezıdentiniń – Elbasynyń zańdy qyzmetine kedergi jasaýǵa, Qazaqstan Respýblıkasy Tuńǵysh Prezıdentin - Elbasyn kópshilik aldynda qorlaýǵa nemese onyń abyroıy men qadir-qasıetine ózgedeı qol suǵýǵa, sondaı-aq Qazaqstan Respýblıkasy Tuńǵysh Prezıdentiniń – Elbasynyń beınesin búldirýge jol berilmeıdi jáne ondaı áreketter zańmen qýdalanady.

♦ Qazaqstan Respýblıkasynyń Tuńǵysh Prezıdentine – Elbasyna eshkimniń tıisýine bolmaıdy. Ol ózi Qazaqstan Respýblıkasy Prezıdentiniń ókilettikterin oryndaý kezeńinde jasaǵan, al bular toqtatylǵannan keıin Qazaqstan Respýblıkasynyń Tuńǵysh Prezıdenti – Elbasy degen óz mártebesin júzege asyrýǵa baılanysty áreketteri úshin jaýaptylyqqa tartylmaıdy. Ony ustap alýǵa, qamaqqa alýǵa jáne kúzetpen ustaýǵa, tintýge, odan jaýap alýǵa ne jeke basyn jete tekserýge bolmaıdy.

Tıispeýshilik Qazaqstan Respýblıkasynyń Tuńǵysh Prezıdentine – Elbasyna jáne onymen birge turatyn otbasy múshelerine jeke menshik quqyǵymen tıesili barlyq múlikke, sondaı-aq olar paıdalanatyn turǵyn jáne qyzmettik úı-jaılarǵa, qyzmettik kólikke, baılanys quraldaryna, jazysqan hattaryna, olarǵa tıesili qujattarǵa qoldanylady. Tıispeýshilik Qazaqstan Respýblıkasy Tuńǵysh Prezıdentiniń – Elbasynyń qoryna jáne ol quratyn ózge de zańdy tulǵalarǵa tıesili múlikke de qoldanylady.

♦ Qazaqstan Respýblıkasynyń Tuńǵysh Prezıdentine – Elbasyna jáne onymen birge turatyn otbasy múshelerine jeke menshik quqyǵymen tıesili múlikke, sondaı-aq ol quratyn zańdy tulǵalardyń múlkine qandaı da bir shekteýler qoıylmaıdy.

Qazaqstan Respýblıkasy Tuńǵysh Prezıdentiniń – Elbasynyń jáne onymen birge turatyn otbasy músheleriniń banktik shottarynyń banktik qupııalyǵyna jáne olarǵa tıispeýshilikke kepildik beriledi.

El ishinde sońǵy ýaqytta, ásirese qańtar oqıǵasynan keıin N.Nazarbaevty osy aıryqsha statýstan aıyrý, "QR tuńǵysh prezıdenti – elbasy" týraly zańdy joıý týraly oılar jıi aıtylyp júr. Tipti 18 qańtarda atalǵan zańnyń kúshin joıý týraly petısııa iske qosylyp, 54 myńnan astam qol jınalǵan.