• USD 468.56

  • EUR 497.56

  • RUB 7.3

  • CNY 67.18

29 Naýryz, 14:14:41
+35°

Búgin Almatydaǵy Ulttyq kitaphananyń N.Dáýletov atyndaǵy zalynda kórnekti jazýshy, etnograf, baspager Zeınolla Sániktiń shyǵarmashylyǵyna arnalǵan «Dáneker tulǵa», «Halyq murasynyń janashyry» kitaptarynyń tusaýkeseri men ǵylymı-tájirıbelik konferensııa ótti. Is-sharany Zeınolla Sánik atyndaǵy Mádenıet qory arnaıylap belgili qalamgerdiń týǵan kúnine oraılastyryp uıymdastyrǵan. Oǵan zııaly qaýym ókilderi, ádebıettanýshylar men jazýshynyń shyǵarmashylyq joly boıynsha izdenip júrgen magıstrant jastar qatysty.

Is-shara barysynda jazýshynyń jary, aqyn, ustaz, Zeınolla Sánik Mádenıet qorynyń prezıdenti Shamshabaný Hamzaqyzy, Qazaqstan Jazýshylar odaǵy basqarmasynyń tóraǵasy Ulyqbek Esdáýlet, M.O.Áýezov atyndaǵy Ádebıet jáne óner ınstıtýtynyń dırektory Kenjehan Matyjan, Shyǵystaný ınstıtýtynyń dırektory Dúken Másimhanuly quttyqtaý sóz sóıledi. Jazýshynyń shyǵarmashylyǵyndaǵy ózindik izi, oqıǵany hatqa túsirerde dáleldi-dáıekti dúnıelerdi jazǵany jaıly baıan etti.

Foto: Qamshy.kz

Jıyn tizginin ustaǵan jýrnalıst Jarqyn Sálenuly Zeınolla Sánik shyǵarmashylyǵy jas izdenýshiler arasynda jıi zertteý nysanyna aınalatynyn, 2018-2021 jyldar aralyǵynda jazýshy-etnograftyń shyǵarmashylyǵy boıynsha 11 magıstrlik, 6 dıplomdyq jumys jazylyp, qorǵalǵanyn, 2 ǵylymı monografııa, 2 estelikter jınaǵy jaryq kórgenin atap ótti. Bıylǵy oqý jylynda da Zeınolla Sánik shyǵarmashylyǵyn arqaý etken jumystar az emestigin jetkizdi.

Foto: Qamshy.kz

Qalyń oqyrmanǵa jol tartqan qos eńbek Zeınolla Sánik shyǵarmashylyǵyn jańasha qyrynan tanýda qalamger eńbegine tereńirek boılap, zertteı túsýde oljaly týyndy deıdi jınalǵandar.

Foto: Qamshy.kz

«Dáneker tulǵa» kitabyna jazýshynyń ómiri men shyǵarmashylyǵyna arnalǵan estelikter, zertteý maqalalar engen. Onda qalamgerdiń adamı asyl qasıeti aıshyqtalyp, ártúrli janrdaǵy baı shyǵarmashylyq murasyna ádebı-ǵylymı turǵydan taldaý jasalǵan. Jańasha izdenispen baǵa berilgen. Eńbek oqyrmanǵa Zeınolla Sániktiń bolmysy arqyly sheteldegi qazaq ádebıeti men tarıhı tulǵalar ómirinen tyń málimetter usynady.

Al folklortanýshy Dúısengúl Jahannyń «Halyq murasynyń janashyry» eńbeginde Zeınolla Sániktiń etnografııalyq-folklorlyq murasy alǵash ret júıeli túrde taldanyp, ǵylymı oı-tujyrymdar, qorytyndylar shyǵarýǵa talpynys jasalǵan. Qazaq rýhanııatynyń ajyramas quramdas bóligi bolyp sanalatyn Qytaıdaǵy qandastarymyzdyń muralarynyń jınalý, jarııalaný, zerttelý jaǵdaılary jóninde júıeli jumys júrgizgen etnograftyń jalpy shyǵarmashylyq bolmysyndaǵy halyqtyń dástúrli mádenıetine degen kózqarasy tuńǵysh ret tutas keshendi túrde qamtylyp, ǵylymı-tanymdyq turǵydan taldanady.

Qos kitap ta Zeınolla Sániktiń eńbekterin nasıhattaý, zertteý, ǵylymı aınalymǵa engizý, sol arqyly birtutas qazaq ádebıetiniń jınaqtalýy men damýyna úles qosýdy kózdeıdi.

Ǵylymı-tájirıbelik konferensııaǵa Elordadan, Almaty, Aqtóbe, Qyzylorda, Shymkent, Semeı, Taldyqorǵan jáne taǵy basqa óńirlerden kelgen ádebıettanýshylar, ádebıet jáne ǵylymı ınstıtýttardyń basshylary men qyzmetkerleri, professorlar men jas ǵalymdar túrli taqyrypta mazmundy baıandama jasap, jazýshynyń minezin, bolmys-bitimin jan-jaqty ashýǵa tyrysty.

Zeınolla Sánik

Zeınolla Múbárakuly Sánik 1935 jyly Qytaıdyń Tarbaǵataı aımaǵynda dúnıege kelgen. Beıjiń qalasyndaǵy ortalyq jastar ınstıtýtyn bitirip, eńbek jolyn baspagerlikten bastaǵan. Úrimjidegi jastar baspasynda jaýapty redaktor bolyp qyryq jyldaı qyzmet atqarǵan. 1955 jyldan bastap ádebı zertteý jumystaryn jaza bastaǵan. Sol ýaqytta Qytaıda júrgizilgen «mádenı tóńkeristiń» aýyr soqqysyna ushyrap, «halyq jaýy» atanyp aýyr kúnderdi de ótkergen. 1978 jyly tolyq aqtalyp, qyzmeti qalpyna keltirilgen.

Qalamgerdiń ǵylymı eńbekterinen, roman, povesterinen quralǵan jıyrmadan astam kitaby jaryq kórgen. Qazaqstanda «Qarakereı Qabanbaı», «Has batyr Qabanbaı», «Tuǵyryl han», «Demejan batyr», «Halyq kúıshisi Qaıraqbaı», «Baspaı» atty kitaptary men eńbekteri jarııalanǵan.

Kórnekti jazýshy, etnograf 2013 jyldyń 26 qyrkúıeginde ómirden ozdy.

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir