"Nur Otan" partııasynyń jańa atqarýshy hatshysy taǵaıyndaldy

"Nur Otan" partııasynyń tóraǵasy Qasym-Jomart Toqaevtyń qaýlysymen partııanyń atqarýshy hatshysy bolyp Ashat Oralov taǵaıyndaldy.

Ashat Oralov 1990 jyldyń 10 aqpanynda Pavlodar oblysynyń Aqsý qalasynda dúnıege kelgen. Ol L.N.Gýmılev atyndaǵy EUÝ-ny "Aýdarma isi" jáne "Halyqaralyq qatynastar" mamandyǵy boıynsha bitirgen.

2013-2016 jyldary Eýrazııa Ulttyq ýnıversıtetiniń hattamat bóliminiń bas mamany, 2014-2016 jyldary "Nur Otan" partııasynyń "Nur" fılıaly tóraǵasynyń birinshi orynbasary, 2016-2017 jyldary Astana qalasy Jastar saıasaty máseleleri basqarmasy" MM basshysynyń m.a, 2017-2018 jyldary "Astana qalasy Jastar saıasaty máseleleri basqarmasynyń" basshysy bolǵan.

2018 jyldyń qańtar-tamyz aılary aralyǵynda Din isteri jáne azamattyq qoǵam mınıstrligi jastar saıasaty departamentin basqarǵan.

2018-2019 jyldary qoǵamdyq damý mınıstrligi Jastar jáne otbasy isteri komıteti tóraǵasynyń orynbasary, 2019-2020 jyldary Pavlodar oblysy ákiminiń orynbasary, 2020-2021 jyldary Aqparat jáne qoǵamdyq damý mınıstrliginiń vıse-mınıstri qyzmetterin atqarǵan. 2021 jyly shildede Nur-Sultan qalasy ákiminiń orynbasary bolyp taǵaıyndalǵan.

Búgin buǵan deıin osy qyzmetti atqarǵan Baýyrjan Baıbek qyzmetinen ketken.

28 qańtarda ótken partııanyń kezekten tys sezinde prezıdent Toqaev "Nur Otan" partııasynyń tóraǵasy atanyp, partııa tóraǵasynyń birinshi orynbasary laýazymynyń ornyna hatshy laýazymyn engizý qajettigin aıtqan.