31 Qańtar, 2022 NEWS
Foto: Ashyq derekkóz
Almaty qalasynyń ákimi Baqytjan Saǵyntaev qyzmetinen ketip, onyń ornyna Erbolat Dosaev taǵaıyndaldy. Aqparatty prezıdenttiń baspasóz hatshysy Berik Ýálı resmı túrde rastady.
"Memleket basshysynyń Jarlyǵymen Baqytjan Ábdiruly Saǵyntaev Almaty qalasynyń ákimi laýazymynan basqa jumysqa aýysýyna baılanysty bosatyldy; Memleket basshysynyń Jarlyǵymen Erbolat Asqarbekuly Dosaev Almaty qalasynyń Ákimi qyzmetine taǵaıyndaldy. Ol Qazaqstan Respýblıkasy Ulttyq Bankiniń Tóraǵasy laýazymynan bosatyldy" delingen aqparattyq habarlamada.
Baqytjan Saǵyntaev áleýmettik jelide qyzmetten ketýine baılanysty jazba jarııalap, óziniń tusynda atqarylǵan, bastalǵan ister týraly qysqa aıtyp ótti.
"Búgin men óz laýazymymdy jańa ákimge tapsyramyn. Osydan týra 720 kún buryn prezıdent maǵan Almaty ákimdigin basqarýdy senip tapsyrdy. Bul úshin memleket basshysyna rızamyn.
Men sizdermen únemi birge boldym. Qala ómirin jaqsartýǵa bar kúsh-jigerimdi arnadym. Uzaq merzimdi "Almaty-2050" strategııasyn qabyldap, qalany damytýdyń keleshegin aıqyndadyq. Prezıdenttiń "Shetsiz qala" qaǵıdaty negizinde qalaǵa qosylǵan aýdandardyń túıtkildi máselelerin sheshýge basa nazar aýdaryp, "Jańa Almaty" keshendi baǵdarlamasyn qabyldadyq.
Biz áleýmettik máselelerdi sheshý úshin Almatyny aglomerasııa retinde damytý jáne oblystyń qalamen shektesetin 4 aýdanynda jumys oryndaryn qurý jumysyn kún tártibine qoıdyq. Densaýlyq saqtaý júıesi nyǵaıtyldy. Bir jyldyń ishinde eń zamanaýı jabdyqtarmen jabdyqtalǵan 3 juqpaly aýrýlar aýrýhanasyn iske qostyq. Pandemııa kezinde densaýlyq saqtaý júıesindegi daǵdarysqa jol berilmedi.
Mektepterdi jedel salý baǵdarlamasyn qolǵa aldyq. Tek 2021 jyly 33 jańa mektep salyndy. Bul – mektepterdegi oryn tapshylyǵyn azaıtýǵa baǵyttalǵan túbegeıli qadam boldy. Ekologııany jaqsartý úshin júıeli eki sheshim qabyldandy: mıllıon aǵash otyrǵyzý jáne ekinshi JEO-ny gazǵa aýystyrý.
Meniń árbir jumys kúnim sizderdiń kóz aldylaryńyzda ótti. О́zderińizben árdaıym kezdesip, aqyldasyp otyrdyq. Apta saıyn Akimat Live tikeleı efırine shyqtym. Atqarylǵan sharalar týraly únemi habardar boldyńyzdar. Birge atqarylǵan jumys úshin almatylyqtarǵa alǵys aıtamyn!
Qalamyzǵa jáne barsha almatylyqtarǵa baqytty ǵumyr tileımin! Almaty máńgi meniń júregimde" delingen Saǵyntaev jazbasynda.
Túrli derekkózder Baqytjan Saǵyntaevtyń qyzmetinen ketip, onyń ornyna Erbolat Dosaev keletini týraly kúni buryn jazǵan bolatyn.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir