«Qazaqstan halqyna» qorynyń artynda Qulybaev tur ma?

Táýelsiz Qazaqstan tarıhyndaǵy eń iri qandy qaqtyǵystan keıin el prezıdenti Qasym-Jomart Toqaevtyń tapsyrmasy boıynsha qurylǵan «Qazaqstan halqyna» qorynyń tórt quryltaıshysy bar. Birinshisi – «Qoǵamdyq baqylaý jáne monıtorıng» respýblıkalyq qoǵamdyq birlestigi, ekinshisi – «Meniń  Atamekenim» qoǵamdyq birlestigi, úshinshisi – Elmıra Álıeva, tórtinshisi – Baqyt Baıǵalıeva.

 

«Qazaqstan halqyna» qory týraly resmı anyqtama. Elektrondy úkimet portalynan jasalǵan skrınshot

 

Qorǵa quryltaıshylyq etetin eki qoǵamdyq birlestik te memlekettik emes.

 

Eks-prezıdent Nursultan Nazarbaevtyń kúıeý balasy, kásipker Tımýr Qulybaev/Foto: Olympic.kz

 

Bul qoǵamdyq birlestik 2018 jyly 17 mamyrda qurylǵan. Uıym basshysy – Lázzat Shyńǵysbaeva degen azamat.

44 jastaǵy Shyńǵysbaeva «Meniń Atamekenim» qoǵamdyq birlestiginen bólek, taǵy eki uıymdy basqarady. Onyń biri – Almaty oblystyq kásipkerler palatasy, ekinshisi –  «Adal» partııasynyń Almaty oblysyndaǵy fılıaly.

Munan bólek, Shyńǵysbaeva oblystyq fılıalyna jetekshilik etetin «Adal» partııasynyń da Tımýr Qulybaevqa qatysy bary qoǵamda jıi aıtylady. Bul partııa 2020 jyldyń qarashasyna deıin «Birlik» dep ataldy. Eldegi keıingi parlament saılaýynyń aldynda partııa ataýy «Adal» dep ózgerip, saılaýaldy naýqanda saıası uıym belsendi nasıhat júrgizdi, biraq májiliske óte alǵan joq. Sol kezde bul partııany Nazarbaevtyń kúıeý balasy Qulybaev satyp alǵany aıtylǵan.

Shyńǵysbaeva basqaratyn «Meniń Atamekenim» qoǵamdyq birlestigi «Qazaqstan halqyna» dep atalatyn qor quryltaıshylarynyń biri ekenin joǵaryda aıttyq. Al bul birlestiktiń óziniń 11 quryltaıshysy bar. Alaıda elektrondy úkimet portalynda 11 quryltaıshynyń bireýi jasyrylǵan. Qalǵan ony mynalar: Mádenıet Bojbanov, Qaınar Abasov, Talǵat Jumatov, Raıhangúl Satabaeva, Janna Telpekbaeva, Ermek Dúısenhanov, Jandar Sadyqov, Shuǵa Naýryzbaeva, Alena Gýlıaeva jáne Eldos Úshkemrov. Bul adamdardyń birazy Qulybaevtyń baqylaýynda bolǵan «Atameken» kásipkerler palatasynda jumys istegen.

 

«Meniń Atamekenim» qoǵamdyq birlestigi týraly resmı anyqtama. Elektrondy úkimet portalynan jasalǵan skrınshot

 

Internettegi aqparatqa qaraǵanda, «Meniń Atamekenim» qoǵamdyq birlestigi qurylǵaly beri qaıyrymdylyqpen aınalysyp kele jatyr. Uıym úsh jylda 3,7 mln teńge salyq tólegen. Bir qyzyǵy, bul birlestiktiń quryltaıshylary «Qazaqstan halqyna» degen qor resmı tirkelgen kúni, ıaǵnı, 14 qańtarda ózgergen. Biraq elektrondy úkimet portalynan 14 qańtarǵa deıin bul birlestiktiń quryltaıshylary kim bolǵanyn kórý múmkin emes.

 

«Qoǵamdyq baqylaý jáne monıtorıng» respýblıkalyq qoǵamdyq birlestigi týraly resmı anyqtama. Elektorondy úkimet portalynan jasalǵan skrınshot

 

Prezıdent tapsyrmasy boıynsha qurylǵan qordyń qalǵan eki quryltaıshysy jeke adamdar. Olar: «Orfandyq aýrýlary bar pasıentterge kómek kórsetý qaýymdastyǵy» tóraıymy Baqyt Baıǵalıeva men «Help Today» qaıyrymdylyq qorynyń tóraıymy Elmıra Álıeva.

Prezıdent Toqaev «Qazaqstan halqyna» qory qurylarda «Birinshi prezıdent – «elbasynyń» arqasynda óte tabysty kompanııalar men halyqaralyq deńgeıdegi baı adamdardyń toby paıda boldy. Halyqqa tıesili baılyqty halyqqa beretin, júıeli túrde kómektesetin ýaqyt keldi. Úkimet kompanııalardy anyqtap, olarmen «Qazaqstan halqyna» qoryna aýdaratyn salymdaryn anyqtaýy tıis» degen bolatyn.

Toqaevtyń bul sózi qor halyqqa kómek kórsetý maqsatynda qurylǵanyn ańǵartady. Biraq qor quryltaıshylary retinde ne sebepti jeke adamdar men memlekettik emes uıymdar tańdalǵany túsiniksiz.

«Qazaqstan halqyna» dep atalatyn qor qurylǵan soń onyń 14 adamnan turatyn qamqorshylyq keńesiniń quramy jarııalanǵan edi. Alaıda sol on tórttiktiń arasynan qordyń resmı quryltaıshylary qatarynda qamqorshylyq keńesiniń tórt múshesi – Saıda Táýkeleva («Qoǵamdyq baqylaý jáne monıtorıng» QB), Lázzat Shyńǵysbaeva («Meniń Atamekenim» QB), Baqyt Baıǵalıeva jáne Elmıra  Álıeva ǵana bar. Qamqorshylyq keńesiniń múshesi retinde atalǵan qalǵan 10 adam resmı túrde qordyń quryltaıshysy atanatyn-atanbaıtyny bizge belgisiz. Jalpy, halyq ıgiligi úshin ashylǵan qordyń quryltaıshylary ne sebepti jeke adamdar men memlekettik emes uıymdar bolǵany óte túsiniksiz.